ตตฺถ ภาวิตตฺตานนฺติ ภาวิตตฺตานํ เตสํ ปญฺจนฺนํ อิสิสตานํ ฯ อจฺฉรํ กามยนฺโตวาติ โส กิร เตสํ อิสีนํ มหาชมฺพูเปสิยา ขาทนกาเล อนาคมนํ วิทิตฺวา เกน นุโข การเณน นาคจฺฉนฺติ สเจ กตฺถจิ คตา ชานิสฺสามิ โน เจ อถ เตสํ อิสีนํ สนฺติเก ธมฺมํ สุณิสฺสามีติ อุยฺยานํ คนฺตฺวา อิสีนํ ปาเท วนฺทิตฺวา คณเชฏฺฐกสฺส สนฺติเก ธมฺมํ สุณนฺโต นิสีทิ ฯ สุริเย อตฺถงฺคเต อุยฺโยชิยมาโนปิ อชฺช อิเธว วสิสฺสามีติ วตฺวา อิสิคณํ วนฺทิตฺวา ปณฺณสาลํ ปวิสิตฺวา นิปชฺชิ ฯ รตฺติภาเค สกฺโก เทวราชา เทวจฺฉราสงฺฆปรวุโต สทฺธึ อตฺตโน ปริจาริกาหิ อิสิคณํ วนฺทิตุํ อาคโต ฯ สกลาราโม เอโกภาโส อโหสิ ฯ สุชาโต กินฺนุ โข เอตนฺติ อุฏฺฐาย ปณฺณสาลฉิทฺเทน โอโลเกนฺโต สกฺกํ อิสิคณํ วนฺทิตุํ อาคตํ เทวจฺฉราปริวุตํ ทิสฺวา อจฺฉรานํ สห ทสฺสเนน ราครตฺโต อโหสิ ฯ สกฺโก นิสีทิตฺวา ธมฺมกถํ สุตฺวา สกฏฺฐานเมว คโต ฯ กุฏุมฺพิโกปิ ปุนทิวเส อิสิคณํ วนฺทิตฺวา ปุจฺฉิ ภนฺเต โก นาเมโส รตฺติภาเค ตุมฺหากํ วนฺทนตฺถาย อาคโตติ ฯ สกฺโก อาวุโสติ ฯ ตํ ปริวาเรตฺวา นิสินฺนา กา นาเมตาติ ฯ เทวจฺฉรา นาเมตาติ ฯ โส อิสิคณํ วนฺทิตฺวา เคหํ คนฺตฺวา คตกาลโต ปฏฺฐาย อจฺฉรํ เม เทถ อจฺฉรํ เม เทถาติ วิลปิ ฯ อถ นํ ญาตกา ปริวาเรตฺวา ภูตาวิฏฺโฐ นุโขติ อจฺฉรํ ปหรึสุ ฯ โส นาหํ เอตํ อจฺฉรํ กเถมิ เทวจฺฉรํ กเถมีติ วตฺวา อยํ อจฺฉราติ อลงฺกริตฺวา อานีตํ ภริยํปิ คณิกํปิ โอโลเกนฺโต นายํ อจฺฉรา ยกฺขินี เอสาติ เทวจฺฉรํ เม เทถาติ วิลปนฺโต นิราหาโร ตตฺเถว ชีวิตกฺขยํ ปาปุณิ ฯ เตน วุตฺตํ

อจฺฉรํ กามยนฺโตว น โส ภุญฺชิ น โส ปิวิ

กุสคฺเคนูทกมาทาย สมุทฺเท อุทกํ มิเนติ ฯ

ตตฺถ สมุทฺเท อุทกํ มิเนติ สมฺม กาฬหตฺถิ โย กุสคฺเคน อุทกํ คเหตฺวา เอตฺตกํ สิยา สมุทฺเท อุทกนฺติ เตน สทฺธึ อุปมาย มิเนยฺย โส เกวลํ มิเนยฺย กุสคฺเค อุทกํ ปน อติปริตฺตเมว ยถา ตํ เอวํ มานุสิกา กามา ทิพฺพกามานํ สนฺติเก ตสฺมา โส สุชาโต อญฺญํ อิตฺถึ น โอโลเกสิ อจฺฉรเมว ปตฺเถนฺโต มโต ฯ เอวเมวาติ ยถา โส ทิพฺพกามํ อลภนฺโต ชีวิตํ ชหิ เอวํ อหํปิ อุตฺตมรสํ มนุสฺสมํสํ อลภนฺโต ชีวิตํ ชหิสฺสามีติ อาห ฯ