ราชาปิ อญฺญํ อุปมํ วตฺตุกาโม อโหสิ ฯ นาครา ปน อุฏฺฐาย เสนาปติ กึ กโรสิ กึ มนุสฺสมํสขาทกโจรํ คเหตฺวา วิจรสิ สเจ น วิรมิสฺสติ ตฺวํ รฏฺฐโต ตํ ปพฺพาเชหีติ นาสฺส กเถตุํ อทํสุ ฯ ราชา พหูนํ กถํ สุตฺวา ภีโต ปุนปิ วตฺตุํ นาสกฺขิ ฯ ปุนปิ ตํ เสนาปติ กึ มหาราช วิรมิตุํ สกฺขิสฺสิ โนติ วตฺวา น สกฺโกมีติ วุตฺเต สพฺพํ โอโรธคณญฺจ ปุตฺตธีตโร จ สพฺพาลงฺการปฏิมณฺฑิเต เอกปสฺเส ฐเปตฺวา มหาราช อิมํ ญาติมณฺฑลญฺจ อมจฺจคณญฺจ รชฺชสิริญฺจ โอโลเกหิ มา เอวํ นสฺสิสฺสสิ วิรมถ มหาราช มนุสฺสมํสขาทนโตติ อาห ฯ ราชา น มยฺหํ เอเต มนุสฺสมํสโต ปิยตรนฺติ วตฺวา เตนหิ ตุมฺเห มหาราช อิมมฺหา นครา จ รฏฺฐา จ นิกฺขมถาติ วุตฺเต กาฬหตฺถิ น เม รชฺเชนตฺโถ นครา นิกฺขมามิ เอกํ ปน เม ขคฺคญฺจ รสกญฺจ ภาชนญฺจ เทหีติ อาห ฯ อถสฺส ขคฺคญฺจ มนุสฺสมํสปจนภาชนญฺจ ปจฺฉิญฺจ อุกฺขิปาเปตฺวา รสกญฺจ ทตฺวา รฏฺฐา ปพฺพาชนียกมฺมํ กรึสุ ฯ โส ขคฺคญฺจ รสกญฺจ อาทาย นครา นิกฺขมิตฺวา อรญฺญํ ปวิสิตฺวา เอกสฺมึ นิโคฺรธมูเล วสนฏฺฐานํ กตฺวา ตตฺเถว วสนฺโต อฏวิมคฺเค ฐตฺวา มนุสฺเส คตาคเต มาเรตฺวา อาหริตฺวา รสกสฺส เทติ ฯ โสปิสฺส มํสํ ปจิตฺวา รญฺโญ อุปนาเมสิ ฯ เอวํ อุโภปิ ชีวนฺติ ฯ อหํ มนุสฺสโจโร โปริสาโทติ วตฺวา ตสฺมึ ปกฺขนฺเต โกจิ สกภาเวน สณฺฐาเรตุํ น สกฺโกติ สพฺเพ ภูมิยํ ปตึสุ ฯ เตสุ ยํ ยํ อิจฺฉติ ตํ ตํ อุทฺธํปาทํ อโธสิรํ กตฺวา อาหริตฺวา รสกสฺส เทติ ฯ โส เอกทิวสํ อรญฺเญ กิญฺจิ มนุสฺสํ อลภิตฺวา อาคโต รสเกน กึ เทวาติ วุตฺเต รสก อุทฺธเน อุกฺขลึ อาโรเปหีติ อาห ฯ มํสํ กหํ เทวาติ ฯ ลภิสฺสามิ อหํ มํสนฺติ อาห ฯ โส นตฺถิ เม ชีวิตนฺติ กมฺปมาโน ราชานํ วนฺทิตฺวา โรทมาโน อุทฺธเน อคฺคึ กตฺวา อุกฺขลึ อาโรเปสิ ฯ อถ นํ โปริสาโท อสินา ปหริตฺวา มาเรตฺวา สยเมวสฺส มํสํ ปจิตฺวา ขาทิ ตโต ปฏฺฐาย เอกโกว ชาโต ยํ ยํ ลภิตฺวา สยเมว ปจิตฺวา ขาทติ ฯ โปริสาโท มนุสฺสานํ มคฺคํ ปฏิหนตีติ สกลชมฺพูทีเป ปากโฏ อโหสิ ฯ ปพฺพาชนียกณฺฑํ นิฏฺฐิตํ ฯ

ตทา เอโก สมฺปนฺนวิภโว พฺราหฺมโณ ปญฺจหิ สกฏสเตหิ โวหารํ กโรนฺโต ปุพฺพนฺตโต อปรนฺตํ สญฺจรติ ฯ โส จินฺเตสิ โปริสาโท นาม กิร โจโร มคฺเค มนุสฺเส มาเรติ ธนํ ทตฺวา ตํ อฏวึ อติกฺกมิสฺสามีติ ฯ โส อฏวิมุขวาสีนํ มนุสฺสานํ มํ อฏวึ อติกฺกเมถาติ สหสฺสํ ทตฺวา เตหิ สทฺธึ มคฺคํ ปฏิปชฺชิ ฯ คจฺฉนฺโต จ สพฺพสตฺถํ ปุรโต กตฺวา สุนหาตานุลิตฺโต สพฺพาลงฺการปฏิมณฺฑิโต เสตโคณยุตฺเต สุขยานเก นิสินฺโน เตหิ อติวาหิกปุริเสหิ ปริวุโต สพฺพปจฺฉโต อคมาสิ ฯ ตสฺมึ ขเณ โปริสาโท รุกฺขํ อารุยฺห ปุริเส อุปธาเรนฺโต เสสมนุสฺเสสุ กึ อิเมสุ ขาทิตพฺพํ อตฺถีติ วิคตจฺฉนฺโท หุตฺวา พฺราหฺมณํ ทิฏฺฐกาลโต ปฏฺฐาย ตํ ขาทิตุกามตาย ปคฺฆริตเขโฬ อโหสิ ฯ โส ตสฺมึ อตฺตโน สนฺติกํ อาคเต รุกฺขา โอรุยฺห อหํ หเร โจโร โปริสาโทติ ติกฺขตฺตุํ นามํ สาเวตฺวา ขคฺคํ ปริวตฺเตนฺโต วาลุกาย เตสํ มนุสฺสานํ อกฺขีนิ ปูเรนฺโต วิย ปกฺขนฺทิ ฯ เอโกปิ สณฺฐาเรตุํ สมตฺโถ นาม นาโหสิ ฯ สพฺเพ ภูมิยํ อุเรน นิปชฺชึสุ ฯ โส สุขยานเก นิสินฺนํ พฺราหฺมณํ ปาเท คเหตฺวา ปิฏฺฐิยํ อโธสีสกํ โอลมฺเพตฺวา สีสํ โคปฺผเกหิ ปหรนฺโต อุกฺขิปิตฺวา ปายาสิ ฯ ปุริสา อุฏฺฐาย โภ ตสฺส มยํ พฺราหฺมณสฺส หตฺถโต กหาปณสหสฺสํ คณฺหิมฺหา โก นาม อมฺหากํ ปุริสกาโร สกฺโกนฺโต วา อสกฺโกนฺโต วา โถกํ อนุพนฺธามาติ ตํ อนุพนฺธึสุ ฯ โปริสาโทปิ นิวตฺติตฺวา โอโลเกนฺโต กญฺจิ อทิสฺวา สนิกํ ปายาสิ ฯ ตสฺมึ ขเณ เอโก ถามสมฺปนฺโน สูรปุริโส เวเคน อนุพนฺธิตฺวา ตํ สมฺปาปุณิ ฯ โส ตํ ทิสฺวา เอกํ วตึ ลงฺฆนฺโต ขทิรขาณุกํ อติกฺกมิ ฯ ขาณุโก ปิฏฺฐิปาเทน นิกฺขมิ ฯ โส โลหิเตน ปคฺฆรนฺเตน ขญฺชิยมาโน ปายาสิ ฯ อถ นํ โส ปุริโส ทิสฺวา โภ มยา เอส วิทฺโธ เกวลํ ตุมฺเห ปจฺฉโต เอถ คณฺหิสฺสาม นนฺติ อาห ฯ เต ทุพฺพลภาวํ ญตฺวา ตํ อนุพนฺธึสุ ฯ โส เตหิ อนุพนฺธภาวํ ญตฺวา พฺราหฺมณํ วิสชฺเชตฺวา อตฺตานํ โสตฺถิมกาสิ ฯ อติวาหิกปุริสา พฺราหฺมณสฺส ลทฺธกาลโต ปฏฺฐาย กึ อมฺหากํ โจเรนาติ ตโตว นิวตฺตึสุ ฯ โปริสาโทปิ อตฺตโน นิโคฺรธมูลํ คนฺตฺวา ปาโรหพฺภนฺตรํ ปวิสิตฺวา นิปนฺโน อยฺเย รุกฺขเทวเต สเจ เม สตฺตาหพฺภนฺตเรเยว วณํ ผาสุกํ กาตุํ สกฺขิสฺสสิ สกลชมฺพูทีเป เอกสตขตฺติยานํ คลโลหิเตน ตว ขนฺธํ โธวิตฺวา อนฺเตหิ ปริกฺขิปาเปตฺวา ปญฺจมธุรมํเสน พลิกมฺมํ กริสฺสามีติ อายาจนํ อกาสิ ฯ ตสฺส ปน มํสญฺจ อนฺนปานญฺจ อลภนฺตสฺส สรีรํ สุสฺสิ ฯ อนฺโตสตฺตาเหเยว วโณ ผาสุโก อโหสิ ฯ โส เทวตานุภาเวน ตสฺส ผาสุกภาวํ สลฺลกฺเขสิ ฯ โส กติปาหํ มนุสฺสมํสํ ขาทิตฺวา พลํ ลภิตฺวา เอวํ จินฺเตสิ พหูปการา เม เทวตา อายาจนมสฺสา มุญฺจิสฺสามีติ ฯ โส ขคฺคํ อาทาย รุกฺขมูลโต นิกฺขมิตฺวา ราชาโน อาเนสฺสามีติ ปายาสิ ฯ