อถ นํ ปุริมภเว ยกฺขกาเล เอกโต มนุสฺสมํสขาทโก สหายโก ยกฺโข อนุวิจรนฺโต ทิสฺวา อยํ มม อตีตภเว สหาโยติ ญตฺวา สมฺม มํ สญฺชานาสีติ ปุจฺฉิ ฯ น สญฺชานามิ สมฺมาติ ฯ อถสฺส ปุริมภเว ยกฺขกาเล กตการณํ กเถสิ ฯ โส ตํ สญฺชานิตฺวา ปฏิสนฺถารมกาสิ ฯ กหํ นิพฺพตฺโตสีติ ยกฺเขน ปุฏฺโฐ นิพฺพตฺตฏฺฐานญฺจ รฏฺฐา ปพฺพาชนียการณญฺจ อิทานิ วสนฏฺฐานญฺจ ขาณุนา วิทฺธการณญฺจ เทวตาย อายาจนา โมจนตฺถํ คมนการณญฺจ สพฺพํ อาโรเจตฺวา สมฺม ตยาปิ มเมตํ กิจฺจํ นิตฺถริตพฺพํ อุโภปิ มยํ คจฺฉาม สมฺมาติ อาห ฯ สมฺม น คจฺฉามิ เอกํ ปน เม กมฺมํ อตฺถิ อหํ โข ปน อนคฺฆํ ปทลกฺขณํ นาม มนฺตํ ชานามิ โส พลญฺจ ชวญฺจ เตชุสฺสทญฺจ กโรติ ตํ มนฺตํ คณฺหาหีติ ฯ โส สาธูติ สมฺปฏิจฺฉิ ฯ ยกฺโขปิสฺส ตํ ทตฺวา ปกฺกามิ ฯ โปริสาโท มนฺตํ อุคฺคเหตฺวา ตโต ปฏฺฐาย วาตชโว อติสูโร มหาพลปรกฺกโม อโหสิ ฯ โส สตฺตาหพฺภนฺตเรเยว เอกสตราชาโน อุยฺยานาทีนิ คจฺฉนฺเต ทิสฺวา วาตเวเคน ปกฺขนฺทิตฺวา นามํ สาเวตฺวา วคฺคนฺโต นทนฺโต ภยปฺปตฺเต กตฺวา ปาเท คเหตฺวา อโธสิเร กตฺวา ปณฺหิยา สีสํ ปหรนฺโต วาตเวเคน เนตฺวา หตฺถตเลสุ ฉิทฺทานิ กตฺวา รชฺชุยา นิโคฺรธรุกฺเข โอลมฺเพสิ ฯ อคฺคปาทงฺคุลีหิ ภูมิยํ ผุสมานาหิ อถ เต สพฺเพ ราชาโน วาเต ปหรนฺเต มิลาตโกรณฺฑกทามานิ วิย ปริวตฺเตนฺตา โอลมฺพึสุ ฯ สุตโสโม มม ปิฏฺฐาจริโย โหติ สเจ คณฺหิสฺสามิ สกลชมฺพูทีโป ตุจฺโฉ ภวิสฺสตีติ ตํ น เนสิ ฯ โสหํ พลิกมฺมํ กริสฺสามีติ อคฺคึ กตฺวา สูเล ตจฺเฉนฺโต นิสีทิ ฯ รุกฺขเทวตา ตํ กิริยํ ทิสฺวา มยฺหํ กิเรส พลิกมฺมํ กโรติ วเณปิสฺส มยา กิญฺจิ ผาสุกํ กตํ นตฺถิ อิทานิ ตํ อิเมสํ มหาวินาสํ กริสฺสติ กินฺนุ โข กตฺตพฺพนฺติ จินฺเตตฺวา อหเมตํ นิวาเรตุํ น สกฺขิสฺสามีติ จตุนฺนํ มหาราชานํ สนฺติกํ คนฺตฺวา ตมตฺถํ กเถตฺวา นิวาเรถ นนฺติ อาห ฯ เตหิปิ น มยํ โปริสาทํ นิวาเรตุํ สกฺขิสฺสามาติ วุตฺเต สกฺกํ อุปสงฺกมิตฺวา ตมตฺถํ กเถตฺวา นิวาเรถ นนฺติ อาห ฯ โสปิ นาหํ สกฺโกมิ นิวาเรตุํ เอกมตฺถํ ปน อาจิกฺขิสฺสามีติ วตฺวา โก นามาติ วุตฺเต สเทวเก โลเก สทิโส อญฺโญ นตฺถิ กุรุรฏฺเฐ ปน อินฺทปตฺตนคเร โกรพฺยราชปุตฺโต สุตโสโม นาม ตํ นิพฺพิเสวนํ กตฺวา ทเมสฺสติ ราชูนญฺจ ชีวิตํ ทสฺสติ ตญฺจ มนุสฺสมํสํ ขาทนโต โอรมาเปสฺสติ สกลชมฺพูทีเป อมตํ วิย อภิสิญฺจิสฺสติ สเจปิ ราชูนํ ชีวิตํ ทาตุกาโม สุตโสมํ อาเนตฺวา พลิกมฺมํ กาตุํ วฏฺฏตีติ วเทหีติ ฯ สา สาธูติ สมฺปฏิจฺฉิตฺวา ขิปฺปํ อาคนฺตฺวา ปพฺพชิตเวเสน ตสฺส อวิทูเร ปายาสิ ฯ โส ปน ปทสทฺเทน ราชา นุโข โกจิ ปลาโต ภวิสฺสตีติ โอโลเกนฺโต ตํ ทิสฺวา ปพฺพชิตา นาม ขตฺติยาว อิมํ คเหตฺวา เอกสตํ ปูเรตฺวา พลิกมฺมํ กริสฺสามีติ อุฏฺฐาย อสิหตฺโถ อนุพนฺธิ ติโยชนํ อนุพนฺธิตฺวาปิ ปาปุณิตุํ นาสกฺขิ ฯ คตฺเต หิ เสทา มุญฺจึสุ ฯ โส จินฺเตสิ อหํ ปุพฺเพ หตฺถึปิ อสฺสํปิ รถํปิ ธาวนฺตํ อนุพนฺธิตฺวา คณฺหามิ อชฺช อิมํ ปพฺพชิตํ สกาย ปกติยา คจฺฉนฺตํ สพฺพถาเมเนว ธาวนฺโตปิ คณฺหิตุํ น สกฺโกมิ กินฺนุ โข การณนฺติ ฯ ตโต โส ปพฺพชิโต นาม วจนกโร โหติ ติฏฺฐาติ นํ วตฺวา ฐิตํ คณฺหิสฺสามีติ จินฺเตตฺวา ติฏฺฐ สมณาติ อาห ฯ อหํ ตาว ฐิโต ตฺวํ ปน ฐาตุํ วายามํ กโรสีติ ฯ อถ นํ โภ ปพฺพชิตา นาม ชีวิตเหตุปิ อลิกํ น ภณนฺติ ตฺวํ ปน มุสา กเถสีติ วตฺวา คาถมาห