พฺราหฺมโณ ตํ วจนํ วตฺวา มหาราช อิมา กสฺสปทสพเลน เทสิตา จตสฺโส สตารหา คาถาโย ตุมฺเห สุตวิตฺตกาติ สุตฺวา ตุมฺหากํ เทสิตุํ อาคโตมฺหีติ อาห ฯ ราชา ตุฏฺฐมานโส หุตฺวา อาจริย สุฏฺฐุ เต อาคตํ มยา ปน อิโต นิวตฺติตุํ น สกฺกา อชฺช ผุสฺสนกฺขตฺตโยเคน สีสํ นหายิตุํ อาคโตมฺหีติ อหํ ปุนทิวเส อาคนฺตฺวา โสสฺสามิ ตฺวํ มา อุกฺกณฺฐีติ วตฺวา คจฺฉถ ตุมฺเห พฺราหฺมณสฺส อสุกเคเห สยนํ ปญฺญเปตฺวา เทถ ฆาสจฺฉาทนํ สํวิทหถาติ อมจฺเจ อาณาเปตฺวา คนฺตฺวา อุยฺยานํ ปาวิสิ ฯ ตํ อฏฺฐารสหตฺเถน ปากาเรน ปริกฺขิตฺตํ อโหสิ ฯ ตํ อญฺญมญฺญํ สํฆฏฺฏยนฺตา หตฺถิโน ปริกฺขิปึสุ ฯ ตโต อสฺสา ปริกฺขิปึสุ ตโต รถา ตโต ธนุคฺคหา ตโต ปตฺติกาติ ฯ สงฺขุภิตมหาสมุทฺโท วิย อุนฺนาเทนฺโต พลนิกาโยเยว อโหสิ ฯ ราชา โอฬาริกานิ อาภรณานิ โอมุญฺจิตฺวา มสฺสุกมฺมํ การาเปตฺวา นหานจุณฺเณน อุพฺพฏฺฏิตสรีโร โปกฺขรณิยา อนฺโต ราชวิภเวน นหาตฺวา ปจฺจุตฺตริตฺวา อุทกคหณสาฏเกน นิวาเสตฺวา อฏฺฐาสิ ฯ อถสฺส ทุสฺสคนฺธมาลาลงฺการานิ อุปนยึสุ ฯ อถ โปริสาโท จินฺเตสิ อยํ ราชา อลงฺกตกาเล ภาริโก ภวิสฺสติ สลฺลหุกกาเลเยว นํ คณฺหิสฺสามีติ ฯ โส นทนฺโต วคฺคนฺโต มจฺจุ วิย มตฺถเก ขคฺคํ ปริภมนฺโต อหํ หเร โจโร โปริสาโทติ นามํ สาเวตฺวา องฺคุลึ นลาเต ฐเปตฺวา อุทกา อุตฺตริ ฯ ตสฺส สทฺทํ สุตฺวา หตฺถาโรหา สห หตฺถีหิ อสฺสาโรหา สห อสฺเสหิ ภสฺสึสุ รถาโรหา สห รเถหิ ภสฺสึสุ พลนิกายา คหิตคหิตานิ อาวุธานิ ฉฑฺเฑตฺวา อุเรน ภูมิยํ นิปชฺชึสุ ฯ โปริสาโท สุตโสมํ อุกฺขิปิตฺวา คณฺหิ ฯ เสสราชาโน คหณกาเล ปาเท คเหตฺวา อโธสีสกํ กตฺวา ปณฺหิยา สีสํ ปหรนฺโต คจฺฉติ ฯ โพธิสตฺตํ ปน อุปคนฺตฺวา โอนโต อุกฺขิปิตฺวา ขนฺเธ นิสีทาเปสิ ฯ โส โปริสาโท ทฺวาเรน คมนํ ปปญฺโจ ภวิสฺสตีติ จินฺเตตฺวา คมนํ อปสฺสนฺโต สมฺมุขฏฺฐาเนเยว อฏฺฐารสหตฺถุพฺเพธํ ปาการํ อุลฺลงฺฆิตฺวา ปุรโต จ ปคฺคลิตปาเทน มตฺตวรวารณกุมฺเภ อกฺกมิตฺวา ปพฺพตกูฏานิ ปาเตนฺโต วิย วาตชเวน อสฺสรถปิฏฺเฐ อกฺกมนฺโต ปาเตตฺวา รถธุเร รถสีเส อกฺกมิตฺวา ภมรจกฺกํ ภมนฺโต วิย นีลผลกานิ นิโคฺรธปตฺตานิ มทฺทนฺโต วิย เอกเวเคเนว ติโยชนมคฺคํ คนฺตฺวา อตฺถิ นุโข โกจิ สุตโสมสฺสตฺถาย ปจฺฉโต อาคจฺฉนฺโตติ โอโลเกตฺวา กิญฺจิ อทิสฺวา สนิกํ คจฺฉนฺโต สุตโสมสฺส เกสคฺคโต อุทกพินฺทูนิ อตฺตโน อุเร ปติตานิ ทิสฺวา มรณสฺส อภายนกสตฺโต นาม นตฺถิ สุตโสโมปิ มรณภเยน โรทติ มญฺเญติ จินฺเตตฺวา อาห