ตสฺสตฺโถ สมฺม โปริสาท สเจ อิจฺฉสิ เอวรูเปหิ อาวุเธหิ สํวิทหิตารกฺเข ขตฺติยกุเล เม นิพฺพตฺติ นาม มา โหตูติ อสิญฺจ สตฺติญฺจ ปรามสามิ อญฺญํ วา ยํ อิจฺฉสิ ตํ สปถํปิ เต สมฺม อหํ กโรมิ ยถาหํ ตยา ปมุตฺโต คนฺตฺวา พฺราหฺมณสฺส อนโณ หุตฺวา สจฺจมนุรกฺขนฺโต ปุนาคมิสฺสามีติ ฯ

ตโต โปริสาโท อยํ สุตโสโม ขตฺติเยหิ อกตฺตพฺพํ สปถํ กโรติ กึ เม อิมินา เอตุ วา มา วา อหํปิ ขตฺติยราชา มเมว พาหุโลหิตํ คเหตฺวา เทวตาย พลิกมฺมํ กริสฺสามิ อยํ อติวิย กิลมตีติ จินฺเตตฺวา คาถมาห

โย เต กโต สงฺคโร พฺราหฺมเณน

รฏฺเฐ สเก อิสฺสริเย ฐิเตน