ตตฺถ ปุนราวชิสฺสนฺติ ปุน อาคจฺฉามิ ฯ

อถ นํ โปริสาโท มหาราช ตุมฺเห ขตฺติเยหิ อกตฺตพฺพํ สปถํ กริตฺถ ตํ อนุสฺสเรยฺยาถาติ วตฺวา สมฺม โปริสาท ตฺวํ มํ ทหรกาลโต ปฏฺฐาย ชานาสิ หสฺเสนาปิ เม มุสา น กถิตปุพฺพา กึ มุสา กเถสฺสามิ สฺวาหํ อิทานิ รชฺเช ปติฏฺฐิโต ธมฺมาธมฺมํ ชานนฺโต กึ มุสา กเถสฺสามิ สทฺทหสิ มยฺหํ อหนฺเต เสฺว พลิกมฺมํ ปาปุณิสฺสามีติ สทฺทหาปิโต เตนหิ คจฺฉ มหาราช ตุมฺเหสุ อนาคเตสุ พลิกมฺมํ น ภวิสฺสติ เทวตาปิ ตุมฺเหหิ วินา น สมฺปฏิจฺฉิ มา เม พลิกมฺมสฺส อนฺตรายํ กริตฺถาติ มหาสตฺตํ อุยฺโยเชสิ ฯ โส ราหุมุขา มุตฺตจนฺโท วิย นาคพโล ถามสมฺปนฺโน ขิปฺปเมว นครํ ปาปุณิ ฯ

อถ เสนาปิสฺส สุตโสมมหาราชา ปณฺฑิโต มธุรธมฺมกถิโก เอกํ เทฺว กถา กเถตุํ ลภนฺโต โปริสาทํ ทเมตฺวา สีหมุขา มุตฺตมตฺตวรวารโณ วิย อาคมิสฺสติ อิเม ราชานํ โปริสาทสฺส ทตฺวา อาคตาติ อมฺเห นครวาสิโน ชนา ครหิสฺสนฺตีติ จินฺเตตฺวา พหินคเรเยว ฐิตา ตํ ทูรโต อาคจฺฉนฺตํ ทิสฺวา ปจฺจุคฺคนฺตฺวา วนฺทิตฺวา กถํ มหาราช โปริสาเทน กิลมิโตติ ปฏิสนฺถารํ กตฺวา โปริสาเทน มยฺหํ มาตาปิตูหิ ทุกฺกรํ กตํ ตถารูโป นาม จณฺโฑ สาหสิโก มม ธมฺมกถํ สุตฺวา มํ วิสชฺเชสีติ วุตฺเต ราชานํ อลงฺกริตฺวา หตฺถิกฺขนฺธํ อาโรเปตฺวา ปริวาเรตฺวา นครํ ปาวิสิ ฯ ตํ ทิสฺวา สพฺเพ นาครา ตุสฺสึสุ ฯ โสปิ ธมฺมครุตาย ธมฺมโสณฺฑตาย มาตาปิตโร อทิสฺวาว ปจฺฉาปิ เต ปสฺสิสฺสามีติ ราชนิเวสนํ ปวิสิตฺวา ราชาสเน นิสีทิตฺวา พฺราหฺมณํ ปกฺโกสาเปตฺวา มสฺสุกมฺมาทีนิ จสฺส อาณาเปตฺวา กปฺปิตมสฺสุํ นหาตานุลิตฺตํ วตฺถาลงฺการปฏิมณฺฑิตํ กตฺวา อาเนตฺวา ทสฺสิตกาเล สยํ ปจฺฉา นหาตฺวา ตสฺส อตฺตโน โภชนํ ทาเปสิ ฯ ตสฺมึ ภุตฺเต สยํ ภุญฺชิตฺวา ตํ มหารเห ปลฺลงฺเก นิสีทาเปตฺวา ธมฺมครุกตาย อสฺส คนฺธมาลาทีหิ ปูชํ กตฺวา สยํ นีจาสเน นิสีทิตฺวา ตุมฺเหหิ มยฺหํ อานีตา สตารหา คาถา สุโณมิ อาจริยาติ ยาจิ ฯ

ตมตฺถํ ปกาเสนฺโต สตฺถา อาห