ตโต หเว ทูรตรํ วทนฺติ

สตญฺจ ธมฺโม อสตญฺจ ราชาติ ฯ

ตตฺถ สกิเทวาติ เอกวารเมว ฯ สพฺภีติ สปฺปุริเสหิ ฯ สา นนฺติ สา สพฺภิ สห สงฺคติ สมาคโม เอกวารํ ปวตฺโตปิ ตํ ปุคฺคลํ ปาเลติ รกฺขติ โคเปติ ฯ นาสพฺภีติ อสปฺปุริเสหิ ปน พหุ สุจิรํปิ กโต สงฺคโม เอกฏฺฐาเน นิวาโส น ปาเลติ อนตฺถาวโห โหตีติ อตฺโถ ฯ สมาเสถาติ สทฺธึ นิสีเทยฺย สพฺพอิริยาปเถ ปณฺฑิเตเหว สทฺธึ ปวตฺเตยฺยาติ อตฺโถ ฯ สนฺถวนฺติ มิตฺตสนฺถวํ ฯ สตํ สทฺธมฺมนฺติ ปณฺฑิตานํ พุทฺธาทีนํ สตฺตตึสโพธิปกฺขิยธมฺมสงฺขาตํ สทฺธมฺมํ ฯ เสยฺโยติ เอตํ ธมฺมํ ญตฺวา วุฑฺฒิเยว โหติ หานิ นาม นตฺถีติ อตฺโถ ฯ ราชรถาติ ราชูนํ อาโรหณียรถา ฯ สุจิตฺตาติ สุปริกมฺมกตา ฯ สพฺภิ ปเวทยนฺตีติ พุทฺธาทโย สนฺโต สพฺภีติ สํขฺยํ คตํ โสภนํ อุตฺตมํ นิพฺพานํ ปเวทยนฺติ โส นิพฺพานสงฺขาโต สตํ ธมฺโม ชรํ น อุเปติ น ชิรติ ฯ นภนฺติ อากาโส ฯ ทูเรติ ปฐวี หิ ปติฏฺฐา สงฺคหณา อากาโส นิราลมฺโพ อปฺปติฏฺโฐ อิติ อุโภ เอเต เอกาพทฺธาปิ วิสํโยคฏฺเฐน อนุปลิตฺตฏฺเฐน ทูเร นาม โหนฺติ ฯ ปารนฺติ โอริมตีรโต ปรตีรํ ฯ ตทาหูติ ตํ อาหุ ฯ

อิติ พฺราหฺมโณ จตสฺโส สตารหา คาถาโย กสฺสปทสพเลน เทสิตนิยาเมน กเถตฺวา ตุณฺหี อโหสิ ฯ