สพฺพํ ตหึ ลภสิ สามิตาย

สจฺเจน กึ ปสฺสติ อานิสํสนฺติ ฯ

ตตฺถ ปาสาทวาสาติ สมฺม สุตโสม ตว ติณฺณํ อุตูนํ อนุจฺฉวิกา ทิพฺพวิมานกปฺปา ตโย นิวาสปาสาทา ฯ ปฐวีควสฺสาติ ปฐวี จ คาโว จ อสฺสา จ ฯ กามิตฺถิโยติ กามวตฺถุภูตา อิตฺถิโย ฯ กาสิกจนฺทนญฺจาติ กาสิกวตฺถญฺจ โลหิตจนฺทนญฺจ ฯ สพฺพํ ตหินฺติ เอตญฺจ อญฺญญฺจ อุปโภคปริโภคํ สพฺพํ ตฺวํ ตหึ อตฺตโน นคเร สามิตาย ลภสิ สามี หุตฺวา ยถา อิจฺฉสิ ตถา ปริภุญฺชิตุํ ลภสิ โส ตฺวํ สพฺพเมตํ ปหาย สจฺจานุรกฺขี อิธาคจฺฉนฺโต สจฺเจน กิมานิสํสํ ปสฺสสีติ ฯ

ตโต โพธิสตฺโต อาห