ตตฺถ สาธุตรนฺติ ยสฺมา สพฺเพปิ รสา สตฺตานํ สพฺพกาเลเยว ปณีตา โหนฺติ ตสฺมา สจฺจํ เตสํ สาธุตรํ ยสฺมา วา วิรติสจฺจวจีสจฺเจ ฐิตา ชาติมรณสงฺขาตสฺส เตภูมิกวฏฺฏสฺส ปารํ อมตมหานิพฺพานํ ตรนฺติ ปาปุณนฺติ ตสฺมา สาธุตรนฺติ ฯ

เอวมสฺส มหาสตฺโต สจฺเจ อานิสํสํ กเถสิ ฯ ตโต โปริสาโท วิกสิตปทุมปุณฺณจนฺทสสฺสิรีกมิวสฺส มุขํ โอโลเกตฺวา อยํ สุตโสโม องฺคารจิตกํ ปสฺสติปิ มํ สูลํ ตจฺเฉนฺตํ ปสฺสติปิ จิตฺตุตฺราสมตฺตํปิสฺส นตฺถิ กึ นุโข เอส สตารหานํ คาถานํ อานุภาโว อุทาหุ สจฺจสฺส อญฺญสฺเสว วา กสฺสจีติ จินฺเตตฺวา ปุจฺฉามิ ตาว นนฺติ ปุจฺฉนฺโต คาถมาห

มุตฺโต ตุวํ โปริสาทสฺส หตฺถา

คนฺตฺวา สกํ มนฺทิรํ กามกามี