ตตฺถ สุกตนฺติ นานปฺปกาเรหิ สุฏฺฐุ กตํ ฯ สุนิฏฺฐิตนฺติ นานาสมฺภารโยชเนน สุฏฺฐุ นิฏฺฐิตํ ฯ กถํ เอโก รมสีติ มูลผลาทีนิ ขาทนฺโต กถํ รมิสฺสสิ เอหิ มหาราช คมิสฺสามาติ ฯ เวลฺลิวิลากมชฺฌาติ เอตฺถ เวลฺลีติ ราสิ วิลากมชฺฌาติ วิลคฺคมชฺฌา อุตฺตตฺตฆนสุวณฺณราสิปภา เจว ตนุทีฆมชฺฌา จาติ ฯ เทเวสูติ เทวโลเก อจฺฉรา อินฺทํ วิย รมณีเย พาราณสินคเร ปุพฺเพ ปโมทยึสุ ตา หิตฺวา อิธ กึ กริสฺสสิ เอหิ สมฺม คจฺฉามาติ ฯ ตมฺพูปธาเนติ รตฺตูปธาเน ฯ สพฺพสยนมฺหีติ สพฺพตฺถรณตฺถเต สยเน ฯ อลงฺกเตติ อเนกภูมิกา ทสฺเสตฺวา อทฺธรตฺตาลงฺกตยุตฺเต ตตฺถ ตุวํ ปุพฺเพ สยีติ อตฺโถ ฯ สุขนฺติ ตาทิสสฺส สยนสฺส มชฺฌมฺหิ สุขํ สยิตฺวา อิทานิ กถํ อรญฺเญ รมิสฺสสิ เอหิ คจฺฉาม สมฺมาติ ฯ นิสฺสิเวติ รตฺติภาเค ฯ เหตฺวาติ เอวรูปํ สมฺปตฺตึ ฉฑฺเฑตฺวา ฯ อุยฺยาน สมฺปนฺนปหูตมาลฺยนฺติ มหาราช ตว อุยฺยานํ สมฺปนฺนนานาวิธปุปฺผํ ฯ มิคาชินูเปตปุรํ สุรมฺมนฺติ ตํ อุยฺยานํ มิคาชินํ นาม นาเมน เตน อุเปตํ ปุรํปิ เต สุฏฺฐุ รมฺมํ ฯ หิตฺวาติ เอวรูปํ มโนรมํ นครํ ฉฑฺเฑตฺวา ฯ

อิติ มหาสตฺโต อปฺเปว นาเมส ปุพฺเพ อนุภุตฺตํ อุปโภคปริโภครสํ สริตฺวา คนฺตุกาโม ภเวยฺยาติ โปริสาทํ ปฐมํ โภชเนน ปโลเภสิ ฯ ทุติยํ กิเลสวเสน ตติยํ สยเนน จตุตฺถํ นจฺจคีตวาทิเตน ปญฺจมํ อุยฺยาเนน เจว นคเรน จาติ อิเมหิ เอตฺตเกหิ ปโลเภตฺวา เอหิ มหาราช อหนฺตํ อาทาย พาราณสิยํ ปติฏฺฐเปตฺวา ปจฺฉา สกรฏฺฐํ คมิสฺสามิ สเจ พาราณสิยํ รฏฺฐํ น ลภิสฺสสิ มม อุปฑฺฒรชฺชํ เต ทสฺสามิ กินฺเต อรญฺญวาเสน มม วจนํ กโรหีติ อาห ฯ ตสฺส วจนํ สุตฺวา คนฺตุกาโม หุตฺวา สุตโสโม มยฺหํ อตฺถกาโม อนุกมฺปโก ปฐมํ มํ กลฺยาเณ ปติฏฺฐเปตฺวา อิทานิ โปราณยเสว ปติฏฺฐเปสฺสามีติ วทติ สกฺขิสฺสติ เจส ปติฏฺฐเปตุํ อิมินา สทฺธึเยว คนฺตุํ วฏฺฏติ กึ เม อรญฺญวาเสนาติ จินฺเตตฺวา ตุฏฺฐจิตฺโต ตสฺส คุณํ นิสฺสาย วณฺณํ กเถตุกาโม สมฺม สุตโสม กลฺยาณมิตฺตสํสคฺคโต สาธุตรํ ปาปมิตฺตสํสคฺคโต ปาปตรํ นาม นตฺถีติ วตฺวา อาห

กาฬปกฺเข ยถา จนฺโท หายเตว สุเว สุเว

กาฬปกฺขูปโม ราช อสตํ โหติ สมาคโม ฯ