จตุนฺนมฺปิ มหาทีปานํ ทฺวิสหสฺสปริตฺตทีปปริวารานํ รชฺชํ กาเรตุํ สมตฺโถ โหติ นาสฺส โกจิ อนฺตราโย ปญฺญายตีติ วทึสุ ฯ ราชา เตสํ วจนํ สุตฺวา ตุฏฺโฐ กุมารสฺส นามํ กโรนฺโต ยสฺมา ปน กุมารสฺส ชาตทิวเส สกลกาสิกรฏฺเฐ เทโว วสฺสิ ยสฺมา จ โส รญฺโญ เจว อมจฺจานญฺจ มหาชนานญฺจ หทยํ เตมิยมาโน วิย ชาโต ตสฺมา เตมิยกุมาโรเตฺววสฺส นามํ อกาสิ ฯ อถ นํ เอกมาสิกํ ธาติโย นหาเปตฺวา อลงฺกริตฺวา รญฺโญ สนฺติกํ อานยึสุ ฯ ราชา ปิยปุตฺตํ โอโลเกตฺวา อาลิงฺคิตฺวา สีเส จุมฺพิตฺวา องฺเก นิสีทาเปตฺวา กุมารสฺส รมยมาโน นิสีทิ ฯ ตสฺมึ ขเณ จตฺตาโร โจรา อานีตา ฯ ราชา เต ทิสฺวา เตสุ เอกสฺส โจรสฺส สกณฺฏกาหิ กสาหิ ปหารสหสฺสํ กโรถาติ อาณาเปสิ เอกสฺส โจรสฺส สํขลิกาย พนฺธิตฺวา พนฺธนาคารปฺปเวสนํ กโรถาติ อาณาเปสิ เอกสฺส โจรสฺส สรีเร สตฺติปฺปหารํ กโรถาติ อาณาเปสิ เอกสฺส โจรสฺส สูลาโรปนํ กโรถาติ อาณาเปสิ ฯ

อถ มหาสตฺโต ปิตุวจนํ สุตฺวา ภีตตสิโต หุตฺวา อโห มม ปิตา รชฺชํ นิสฺสาย อติภาริยํ นิรยคามึ กมฺมํ กโรตีติ จินฺเตสิ ฯ ปุนทิวเส โพธิสตฺตํ เสตจฺฉตฺตสฺส เหฏฺฐา อลงฺกตสิริสยเน นิปชฺชาเปสุํ ฯ โส โถกํ นิทฺทายิตฺวา ปพุทฺโธ อกฺขีนิ อุมฺมิเลตฺวา เสตจฺฉตฺตํ โอโลเกนฺโต มหนฺตํ สิริวิภวํ ปสฺสิ ฯ อถสฺส ปกติยา ภีตตสิตสฺส อติเรกตรํ ภยํ อุปฺปชฺชิ ฯ โส จินฺเตสิ กุโต นุโข อหํ อิมํ ราชเคหํ อาคโตมฺหีติ ฯ โส อุปธาเรนฺโต ชาติสฺสรญาเณน เทวโลกโต อาคตภาวํ ญตฺวา ตโต ปรํ โอโลเกนฺโต อุสฺสุทนิรเย ปจนภาวํ ปสฺสิ ตโต ปรํ โอโลเกนฺโต ตสฺมึเยว นคเร ราชภาวํ อญฺญาสิ ฯ อถสฺส สฺวาหํ วีสติวสฺสานิ พาราณสิยํ รชฺชํ กาเรตฺวา อสีติวสฺสสหสฺสานิ อุสฺสุทนิรเย ปจิตฺวา อิทานิ ปุนปิ อิมสฺมึ โจรเคเห นิพฺพตฺโตสฺมิ ปิตา เม หิยฺโย จตูสุ โจเรสุ อานีเตสุ ตถารูปํ ผรุสํ นิรยสํวตฺตนิกํ กถํ กเถสิ สจาหํ รชฺชํ กาเรสฺสามิ ปุนปิ นิรเย นิพฺพตฺติตฺวา มหาทุกฺขํ อนุภวิสฺสามีติ อาวชฺเชนฺตสฺเสว มหนฺตํ ภยํ อุปฺปชฺชิ ฯ โพธิสตฺตสฺส กาญฺจนวณฺณํ สรีรํ หตฺเถน ปริมทฺทิตํ วิย ปทุมํ มิลาตํ ทุวณฺณํ อโหสิ ฯ โส กถํ นุโข อหํ อิมมฺหา โจรเคหา มุญฺเจยฺยนฺติ จินฺเตนฺโต นิปชฺชิ ฯ