อถ นํ เอกสฺมึ อนฺตเร อตฺตภาเว มาตา ภูตปุพฺพา เสตจฺฉตฺเต อธิวตฺถา เทวตา อสฺสาเสตฺวา ตาต เตมิยกุมาร มา โสจิ มา จินฺตยิ มา ภายิ สเจ อิโต มุญฺจิตุกาโมสิ ตวํ อปีฐสปฺปิเยว ปีฐสปฺปิ วิย โหหิ อพธิโรปิ พธิโร วิย โหหิ อมูโคปิ มูโค วิย โหหีติ อิมานิ ตีณิ องฺคานิ อธิฏฺฐาย อตฺตโน ปณฺฑิตภาวํ มา ปกาเสหีติ วตฺวา ปฐมํ คาถมาห

มา ปณฺฑิจฺจยํ วิภาวย พาลมโต ภว สพฺพปาณินํ

สพฺโพ ตญฺชโน โอจินายตุ เอวํ ตว อตฺโถ ภวิสฺสตีติ ฯ

ตตฺถ มา ปณฺฑิจฺจยนฺติ อตฺตโน ปณฺฑิตภาวํ มา ปกาเสหิ ฯ ปณฺฑิจฺจนฺติ อยเมว วา ปาโฐ ฯ พาลมโตติ พาลสมฺมโต ฯ สพฺพปาณินนฺติ สพฺพปาณีภิ ชเนหิ ฯ สพฺโพ ตญฺชโนติ สกโล อนฺโตชโน เจว พหิชโน จ ฯ โอจินายตูติ อวมญฺญตุ นีหรเถตํ กาฬกณฺณินฺติ อวชานาตุ ฯ โส ตสฺสา วจเนน อสฺสาสํ ปฏิลภิตฺวา ทุติยํ คาถมาห