ตตฺถ วิสฏฺฐวจโนติ อปลิพุทฺธกโถ ฯ อกรา อาลเย พหูติ ตุมฺหากํ วญฺจนานิ พหูนิ อกาสิ ฯ ปญฺโญติ ปญฺญวา ฯ สเจ ตวนฺติ ราชานํ ธุรํ กตฺวา อุโภปิ เต เอวมาห ฯ ยตฺถ สมฺมตีติ ยตฺถ ตว ปุตฺโต มยา คหิตปฏิญฺโญ หุตฺวา อจฺฉติ ตตฺถ ตํ ปาปยิสฺสามิ ปปญฺจํ อกตฺวา ลหุํ คนฺตุํ วฏฏตีติ อาห ฯ

เตมิยกุมาโร ปน สารถึ เปเสตฺวา ปพฺพชิตุกาโม หุตฺวา ชาโต ฯ อถ สกฺโก ตสฺส มนํ ญตฺวา วิสฺสุกมฺมํ เปเสสิ ตาต วิสฺสุกมฺม เตมิยกุมาโร ปพฺพชิตุกาโม ตสฺส ปณฺณสาลญฺจ ปพฺพชิตปริกฺขารญฺจ มาเปตฺวา เอหีติ ฯ โส สาธูติ สมฺปฏิจฺฉิตฺวา สคฺคโต โอตริตฺวา ติโยชนิเก วนสณฺเฑ อสฺสมํ มาเปตฺวา รตฺติฏฺฐานทิวาฏฺฐานานิ จ โปกฺขรณีอาวาฏญฺจ มาเปตฺวา อกาลผลรุกฺขสมฺปนฺนํ กตฺวา ปณฺณสาลาย สมีเป จตุวีสติหตฺถปฺปมาณํ จงฺกมํ มาเปตฺวา อนฺโตจงฺกเม ผลิกวณฺณํ วาลุกํ โอกีริตฺวา สพฺเพ จ ปพฺพชิตปริกฺขารานิ คเหตฺวา ปพฺพชนฺตูติ ภิตฺติยํ อกฺขรานิ ลิขิตฺวา อสฺสมปเท มิคปกฺขิโน ปลาเปตฺวา สกฏฺฐานเมว คโต ฯ ตสฺมึ ขเณ มหาสตฺโต ตํ ทิสฺวา อกฺขรานิ วาเจตฺวา สกฺกทตฺติยภาวํ ญตฺวา ปณฺณสาลํ ปวิสิตฺวา สกวตฺถานิ อปเนตฺวา รตฺตวากจีรํ นิวาเสตฺวา เอกํ ปารุเปตฺวา อชินจมฺมํ เอกํสํ กตฺวา ชฏามณฺฑลํ พนฺธิตฺวา กาชํ อํเส กตฺวา กตฺตรทณฺฑํ อาทาย ปรฺณสาลโต นิกฺขมิตฺวา ปพฺพชิตสิรึ สมุฏฺฐหนฺโต อปราปรํ จงฺกมิตฺวา อโห สุขํ ปรมสุขํ ปพฺพชฺชา เม อธิคตาติ อุทานํ อุทาเนตฺวา ปณฺณสาลํ ปวิสิตฺวา กฏฺฐตฺถรเก นิสินฺโน ปญฺจาภิญฺญาโย จ อฏฺฐสมาปตฺติโย จ นิพฺพตฺเตตฺวา สายณฺหสมเย ปณฺณสาลโต นิกฺขมิตฺวา จงฺกมโกฏิยํ ฐิตการรุกฺขโต ปณฺณานิ คเหตฺวา สกฺกทตฺติยภาชเนน อโลณเกน อตกฺเกน นิทฺธูปเนน อุณฺโหทเกน เสเทตฺวา อมตํ ปริภุญฺชนฺโต วิย ปริภุญฺชิตฺวา จตฺตาโร พฺรหฺมวิหาเร ภาเวนฺโต ตตฺถ วาสํ กปฺเปสิ ฯ

กาสิกราชาปิ สุนนฺทสารถิสฺส วจนํ สุตฺวา มหาเสนาคุตฺตํ ปกฺโกสาเปตฺวา ตรมานรูโป คมนปริวจฺฉํ กาเรตุกาโม อาห

โยชยนฺตุ รเถ อสฺเส กจฺฉํ นาเค นิพนฺธถ