ถูลา ชเวน หายนฺติ กีสา หายนฺติ ถามสา

กีเส ถูเล วิวชฺชิตฺวา สํสฏฺฐา โยชิตา หยาติ ฯ

ตตฺถ สํสฏฺฐาติ เอวรูเป อสฺเส มา คณฺหถาติ อาห ฯ กีเส ถูเล วิวชฺชิตฺวาติ กีเส ถูเล อสฺเส มา คณฺหถาติ ฯ สํสฏฺฐา โยชิตา หยาติ วเยน จ วณฺเณน จ ชเวน จ พเลน จ สทิสา อสฺสา โยชิตาติ อตฺโถ ฯ

อถ ราชา ปุตฺตสฺส สนฺติกํ คจฺฉนฺโต จตฺตาโร วณฺเณ อฏฺฐารสเสนิโย สพฺพญฺจ พลนิกายํ สนฺนิปาเตสิ ฯ ตสฺส สนฺนิปาเตนฺตสฺเสว ตโย ทิวสา อติกฺกนฺตา ฯ อถ จตุตฺเถ ทิวเส กาสิกราชา เสนาย สทฺธึ นครโต นิกฺขมิตฺวา คเหตพฺพยุตฺตกํ ธนํ คาหาเปตฺวา ตสฺส อสฺสมํ ปตฺวา ปุตฺเตน สห ปฏินนฺทิโต ปฏิสนฺถารํ อกาสิ ฯ