Mahānipātavaṇṇanā

temiyajātakaṃ

mā paṇḍiccayaṃ vibhāvayāti idaṃ satthā jetavane viharanto mahābhinekkhammapāramiṃ ārabbha kathesi. Ekadivasaṃ hi bhikkhū dhammasabhāyaṃ sannisinnā bhagavato mahābhinekkhammapāramiṃ vaṇṇayantā nisīdiṃsu. Satthā dibbasotena taṃ sutvā gandhakuṭito nikkhamitvā dhammasabhāyaṃ āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva mama pūritapāramissa rajjaṃ chaddetvā mahābhinikkhamanaṃ nāma acchariyaṃ ahaṃ hi pubbe aparipakke ñāṇe pāramiyo pūrentopi rajjaṃ chaddetvā mahābhinikkhamanaṃ nikkhantoyevāti vatvā tuṇhī ahosi tehi yācito atītaṃ āhari.

Atīte bhikkhave bārāṇasiyaṃ kāsikarājā nāma dhammena samena rajjaṃ kāresi. Tassa soḷasasahassā nāṭakitthiyo ahesuṃ. Tāsu ekāpi puttaṃ vā dhītaraṃ vā na labhati. Tadā nāgarā amhākaṃ rañño vaṅsānurakkhito eko puttopi natthīti kusarājajātake āgatanayeneva rājaṅgaṇe sannipatitvā rājānaṃ deva puttaṃ patthethāti āhaṃsu. Taṃ sutvā rājā tasmiṃ khaṇe soḷasasahassā Itthiyo pakkosāpetvā tumhe puttaṃ patthethāti āṇāpesi. Tā itthiyo candādīnaṃ devatānaṃ āyācanaupaṭṭhānādīni katvā patthentiyopi puttaṃ vā dhītaraṃ vā na labhiṃsu. Aggamahesī panassa maddarājadhītā candadevī nāma sīlasampannā ahosi. Rājā bhadde tavaṃpi puttaṃ patthehīti āṇāpesi. Devī tassa rañño vacanaṃ sutvā sādhūti sampaṭicchitvā puṇṇamīdivase uposathaṃ samādayitvā omuttasabbābharaṇā cullasayane nipannā attano sīlaṃ āvajjamānā sacāhaṃ akhaṇḍasīlaṃ rakkhāmi iminā saccena putto me uppajjatūti saccakiriyaṃ akāsi.