Mahānipātavaṇṇanā

candakumārajātakaṃ

rājāsi luddakammoti idaṃ satthā tijjhakūṭe pabbate viharanto devadattaṃ ārabbha kathesi. Tassa vatthu saṃghabhedakakkhandhake āgatameva.

Taṃ tassa pabbajitakālato paṭṭhāya yāva bimbisārarañño maraṇā tatthāgatanayeneva veditabbaṃ. Taṃ pana mārāpetvā devadatto ajātasattuṃ upasaṅkamitvā āha mahārāja tava manoratho matthakaṃ patto mama manoratho pana na tāva pāpuṇātīti. Taṃ sutvā rājā ko pana vo bhante manorathoti. Mahārāja nanu dasabalaṃ māretvā buddho bhavismāmīti. Rājā amhehettha kiṃ kātabbanti. Mahārāja dhanuggahe sannipātāpetuṃ vaṭṭatīti. Sādhu bhanteti rājā akkhaṇavedhīnaṃ dhanuggahānaṃ pañca kulasatāni sannipātāpetvā tato ekatiṃsajane uccinitvā tātā therassa vacanaṃ karothāti vatvā devadattassa santikaṃ pesesi. So tesaṃ jeṭṭhakaṃ āmantetvā evamāha āvuso samaṇo gotamo gijjhakūṭe pabbate viharati asukasmiṃ nāma divāṭṭhāne caṅkamati tvaṃ pana tattha gantvā taṃ visapītena sallena vijjhitvā jīvitakkhayaṃ pāpetvā asukena nāma maggena ehīti. So taṃ pesetvā tasmiṃ magge dve dhanuggahe ṭhapesi tumhākaṃ ṭhitamaggena eko puriso āgamissati tumhe taṃ Jīvitā voropetvā asukamaggena nāma ethāti. Tasmiṃ magge cattāro purise ṭhapesi tumhākaṃ ṭhitamaggena dve purisā āgamissanti tumhe te jīvitā voropetvā asukamaggena nāma ethāti. Tasmiṃ magge aṭṭha jane ṭhapesi tumhākaṃ ṭhitamaggena cattāro purisā āgamissanti tumhe te jīvitā voropetvā asukamaggena nāma ethāti. Tasmiṃ magge soḷasa purise ṭhapesi tumhākaṃ ṭhitamaggena aṭṭha purisā āgamissanti tumhe te jīvitā voropetvā asukamaggena nāma ethāti. Kasmā panevamakāsīti. (attano kammassa paṭicchādanatthaṃ .) so kira attano pāpakammassa paṭicchādanatthaṃ evamakāsi. Atha so jeṭṭhakadhanuggaho vāmato khaggaṃ laggetvā piṭṭhiyā tuṇḍisaraṃ bandhitvā meṇḍasiṅgamahādhanuṃ gahetvā tathāgatassa santikaṃ gantvā vijjhissāmi nanti saññāya dhanuṃ āropetvā saraṃ sannayhitvā ākaḍḍhitvā visajjetuṃ nāsakkhi. Satthā dhanuṃ ākaḍḍhituṃ datvā visajjetuṃ nādāsi. So saraṃ visajjetuṃpi oropetuṃpi asakkonto phāsukkāhi bhijjamānāhi viya mukhato khelena paggharantena kilantarūpo ahosi. Sakalasarīraṃ thaddhajātaṃ yantena pīḷatākārappattaṃ viya ahosi. So maraṇabhayatajjito aṭṭhāsi.