Nikkhamanto taṃ disvā kiṃ idanti amacce pucchi. Devena aggaphalaṃ paribhuttanti ñatvā mahājano naṃ vilumpanto khādīti. Kiṃ nukho bhaṇe imassa pana pattaṃ vā vaṇṇovā khīṇo itarassa ca no khīṇoti. Nipphalatāya na khīṇo devāti. Taṃ sutvā rājā saṃvegaṃ paṭilabhitvā ayaṃ rukkho nipphalatāya nīlobhāso ṭhito ayaṃ pana rukkho saphalatāya obhaggavibhaggo ṭhito idaṃpi rajjaṃ saphalarukkhasadisaṃ pabbajjā nipphalarukkhasadisā sakiñcanasseva bhayaṃ hoti nākiñcanassa ahaṃ pana saphalarukkho viya ahutvā nipphalarukkhasadiso bhavissāmi sampattiṃ cajitvā nikkhamitvā pabbajissāmīti daḷhaṃ katvā manaṃ adhiṭṭhahitvā nagaraṃ pavisitvā pāsādaṃ abhiruyha pāsādadvāre ṭhito va senāpatiṃ pakkosāpetvā mahāsenāpati ajjato paṭṭhāya bhattāhārakañceva mukhodakadantakaṭṭhadāyakañca ekaṃ upaṭṭhākaṃ ṭhapetvā aññe maṃ daṭṭhuṃ mā labhantu tumhe porāṇakavinicchayāmacce gahetvā rajjaṃ anusāsatha ahaṃ pana ito paṭṭhāya upari mahātale samaṇadhammaṃ karissāmīti vatvā pāsādaṃ abhiruyha ekakova samaṇadhammaṃ akāsi. Evaṃ gate kāle mahājano rājaṅgaṇe sannipatitvā mahāsattaṃ adisvā na no rājā porāṇako viyāti vatvā gāthādvayamāha

aporāṇo vata bho rājā sabbabhummo disaṃpati

nājja nacce nisāmeti na gīte kurute mano

na mige napi uyyāne napi haṃse udikkhati