So kira dasavassasahassāyukakāle nibbatto sattavassasahassāni rajjaṃ kāretvā tīṇi vassasahassāni avasiṭṭhe āyumhi pabbaji.
Pabbajanto panesa uyyānadvāre ambarukkhassa diṭṭhakālato paṭṭhāya cattāro māse āgāre vasitvā imamhā rājavesā pabbajitaveso varataro pabbajissāmīti cintetvā upaṭṭhākaṃ rahassena āṇāpesi tāta kañci ajānāpetvā antarāpaṇato kāsāvavatthāni ceva mattikāpattañca āharāhīti. So tathā akāsi. Rājā kappakaṃ pakkosāpetvā kesamassuṃ ohāretvā kappakassa gāmavaraṃ datvā kappakaṃ uyyojetvā ekaṃ kāsāvaṃ nivāsetvā ekaṃ pārupitvā ekaṃ aṅse katvā mattikāpattaṃ thavikāya osāmetvā aṅse laggetvā tato kattaradaṇḍaṃ gahetvā mahātale katipaye vāre paccekabuddhalīlāya aparāparaṃ caṅkamitvā aho sukhaṃ paramasukhaṃ pabbajjā narasukhanti udānaṃ udānesi. So taṃ divasaṃ tattheva vasitvā punadivase suriyuggamanavelāya pāsādā otarituṃ ārabhi. Tadā sīvalīdevī tā sattasatā vallabhitthiyo pakkosāpetvā ciraṃ na diṭṭho no rājā cattāro māsā atikkantā ajja naṃ passissāma sabbālaṅkārehi alaṅkaritvā tumhe yathābalaṃ itthīkuttākappabhāvahasitakathitagītādike vilāse dassetvā taṃ kilesabandhanena bandhituṃ vāyameyyāthāti āha. Sāpi alaṅkatapaṭiyattā tāhi saddhiṃ rājānaṃ passissāmīti pāsādaṃ abhiruhantī taṃ otarantaṃ disvāpi na sañjānantī rañño ovādaṃ dātuṃ āgato paccekabudadho bhavissatīti saññāya taṃ vanditvā ekamantaṃ aṭṭhāsi. Mahāsattopi pāsādā otari. Itarāpi pāsādaṃ abhiruhantī sirisayanapiṭṭhe rañño bhamarapattavaṇṇe kese ca Pasādhanabhaṇḍañca disvā neso paccekabuddho amhākaṃ piyasāmiko bhavissati etha naṃ yācitvā nivattessāmāti vatvā mahātalato otaritvā rājaṅgaṇe rājānaṃ sampāpuṇi patvā ca pana sabbāhi tāhi saddhiṃ kese mocetvā piṭṭhiyaṃ vikīritvā hatthehi hadayaṃ paharitvā kasmā evarūpaṃ karotha mahārājāti atikalūnaṃ paridevamānā rājānaṃ anubandhi. Atha sakalanagaraṃ saṃkhubbhitaṃ ahosi. Tepi rājā no kira pabbajito kuto puna evarūpaṃ dhammikaṃ rājānaṃ labhissāmāti vatvā rodamānā rājānaṃ anubandhiṃsu. Tattha tāsaṃ itthīnaṃ paridevanasaddañceva paridevantiyopi tāyo pahāya rañño gamanañca āvīkaronto satthā āha