Evaṃ vuttepi mahājano rājānaṃ anubandhatiyeva. Athassa etadahosi ayaṃ mahājano nivattituṃ na icchati nivattessāmi nanti Aḍḍhagāvutamaggaṃ gatakāle nivattetvā mahāpathe ṭhito amacce pucchi kassetaṃ rajjanti. Tumhākaṃ devāti. Tenahi tātā imaṃ lekhaṃ antaraṃ karontassa rājadaṇḍaṃ karothāti vatvā kattaradaṇḍena tiriyaṃ lekhaṃ ākaḍḍhi. Tejavatā raññā kataṃ lekhaṃ koci antaraṃ kātuṃ nāsakkhi. Mahājano lekhaṃ ussīsake katvā balavaparidevaṃ paridevi. Devīpi taṃ lekhaṃ antaraṃ kātuṃ asakkontī rājānaṃ piṭṭhiṃ datvā gacchantaṃ disvā sokaṃ saṇṭhāretuṃ asakkontī uraṃ paharitvā mahāmagge tiriyaṃ patitvā parivattamānā taṃ atikkamitvā agamāsi. Mahājano lekhāsāmikehi lekhā bhinnāti deviyā gatamaggeneva gato. Mahāsatto uttarahimavantābhimukho agamāsi. Devīpi sabbasenābalabāhanaṃ ādāya teneva saddhiṃ gatā. Rājā mahājanaṃ nivattetuṃ asakkontoyeva saṭṭhīyojanamaggaṃ gato.

Tadā nārado nāma tāpaso himavante suvaṇṇaguhāyaṃ vasitvā pañcābhiññājhānasukhena vītināmetvā sattāhaṃ atikkamitvā jhānasukhato vuṭṭhāya aho sukhaṃ paramaṃ sukhanti udānaṃ udānesi. So atthi nu kho koci jambūdīpatale imaṃ sukhaṃ pariyesatīti dibbena cakkhunā lokaṃ volokento mahājanakaṃ buddhaṅkuraṃ disvā so rājā mahābhinikkhamanaṃ nikkhamanto sīvalīdevippamukhaṃ mahājanaṃ nivattetuṃ na sakkoti antarāyaṃpissa kareyya bhiyyoso mattāya tassa daḷhasamādānatthaṃ ovādaṃ dassāmīti cintetvā iddhibalenāgantvā rañño purato ākāse ṭhito va tassa ussāhaṃ janetuṃ āha

Kimheso mahato ghoso kānu gāmeva kīḷiyā

samaṇa taveva pucchāmi katthesobhisaṭo janoti.