Atīte bhikkhave bārāṇasinagarato avidūre nadiyā orimatīre eko nesādagāmo ahosi. Paratīrepi eko nesādagāmo ahosi. Ekekasmiṃ gāme pañca pañca kulasatāni vasanti. Dvīsu gāmesu dve nesādajeṭṭhakā sahāyakā ahesuṃ. Te daharakāleyeva evaṃ katikaṃ kariṃsu sace amhesu ekassa dhītā hoti ekassa putto tesaṃ āvāhavivāhaṃ karomāti. Atha orimatīre gāmajeṭṭhakassa gehe putto vijāyi. Jātakkhaṇeyevassadukūlena paṭiggahitattā dukūlo taveva nāmaṃ kariṃsu. Itarassa gehe dhītā vijāyi. Tassā paratīre jātattā pārikāti nāmaṃ kariṃsu. Te ubhopi abhirūpā pāsādikā suvaṇṇavaṇṇā ahesuṃ te nesādakule jātāpi pāṇātipātannāma na kariṃsu. Aparabhāge soḷasavassuddesikaṃ dukūlakumāraṃ mātāpitaro āhaṃsu tāta kumārikaṃ te ānessāmāti. So pana brahmalokato āgato suddhasatto ubhopi kaṇṇe pidahitvā na me gharāvāsena attho ammatāta Mā evaṃ avacutthāti vatvā yāva dutiyampi tatiyampi vuccamānopi na icchi. Pārikāpi mātāpitūhi amma amhākaṃ sahāyakassa putto atthi so abhirūpo pāsādiko suvaṇṇavaṇṇo tassa taṃ dassāmāti vuttāpi tatheva vatvā ubho kaṇṇe pidahi. Sāpi brahmalokato āgatā suddhasattā. Tadā dukūlakumāropi tassā rahassena sāsanaṃ pahiṇi sace pārikā methunadhammena atthikā aññassa gehaṃ gacchatu mama methunachando natthīti. Sāpi tassa tatheva sāsanaṃ pesesi. Mātāpitaro pana tesaṃ anicchamānānaññeva āvāhavivāhaṃ kariṃsu. Te ubhopi kilesasamuddaṃ anotaritvā dve mahābrahmāno viya ekato vasiṃsu. Dukūlakumāro pana macchaṃ vā migaṃ vā na māreti antamaso āhaṭamaṃsaṃpi na vikkīṇāti. Atha naṃ mātāpitaro vadiṃsu tāta tavaṃ nesādakule nibbattopi neva gharāvāsaṃ icchasi na pāṇavadhaṃ karosi kinnāma karissasīti. So evamāha ammatāta tumhesu anujānantesu mayaṃ pabbajissāmāti. Taṃ sutvā mātāpitaro tenahi pabbajathāti anujāniṃsu. Te tuṭṭhahaṭṭhā mātāpitaro vanditvā gāmato nikkhamma anupubbena gaṅgātīrena himavantaṃ pavisitvā yasmiṃ ṭhāne migasammatā nāma nadī himavantato otaritvā gaṅgaṃ pattā taṃ ṭhānaṃ gantvā gaṅgaṃ pahāya migasammatābhimukhā agamaṃsu.