Gacchanti. Atha mahāsatto cintesi kadāci kocideva me mātāpitūnaṃ antarāyo bhaveyyāti tesaṃ gatamaggaṃ sallakkhesi. Athekadivasaṃ tesaṃ vanamūlaphalāphalaṃ ādāya sāyaṇhasamaye nivattantānaṃ assamapadato avidūre sampattānaṃ mahāmegho uṭṭhahi. Te ekaṃ rukkhamūlaṃ pavisitvā vammikamatthake aṭṭhaṃsu. Tassa ca abbhantare āsīviso atthi. Tesaṃ sarīrato sedagandhamissakaṃ udakaṃ otaritvā tassa nāsapūṭaṃ pāvisi. So kujjhitvā nāsavātena pahari. So tesaṃ cakkhūni pāpuṇi. Tena dvepi janā andhā hutvā aññamaññaṃ na passiṃsu. Dukūlapaṇḍito pārikaṃ āmantetvā pārike mama cakkhūni parihīnāni taṃ na passāmīti āha. Sāpi tatheva āha. Te natthi no idāni jīvitanti maggaṃ apassantā paridevamānā aṭṭhaṃsu.
Kiṃ pana tesaṃ pubbakammanti. Te kira pubbe vejjakule jātā ahesuṃ. Atha so vejjo ekassa mahaddhanassa purisassa akkhirogaṃ paṭijaggi. So akkhīni labhitvā tassa kiñci dhanaṃ na deti. Atha vejjo tassa kujjhitvā gehaṃ gantvā attano bhariyāya ārocetvā bhadde ahaṃ tassa akkhirogaṃ paṭijaggāmi idāni mayhaṃ dhanaṃ na deti kiṃ karomāti āha. Sāpi sāmikassa vacanaṃ sutvā kujjhitvā na no tassa santakena dhanenattho tavaṃ bhesajjaṃ tassa ekaṃ yoggaṃ datvā tassa akkhīni kāṇāni karohīti āha. So sādhūti tassā vacanaṃ sampaṭicchitvā gehato nikkhamitvā tassa santikaṃ gantvā tathā akāsi. So mahaddhano puriso Na cirasseva andho ahosi. Te ubhopi iminā pāpakammena cakkhūni parihāyiṃsu.
Atha mahāsatto cintesi mama mātāpitaro aññesu divasesu imāya velāya āgacchanti idāni nesaṃ pavuttiṃ na jānāmīti paṭimaggaṃ gantvā saddamakāsi. Te dve tassa saddaṃ sañjānitvā paṭisaddaṃ katvā puttasinehena tāta idha paripantho atthi mā āgacchāhīti vadiṃsu. Atha ne mahāsatto āha tenahi imaṃ yaṭṭhikoṭiṃ gahetvā ethāti. So tesaṃ dīghayaṭṭhiṃ adāsi. Te yaṭṭhikoṭiṃ gahetvā tassa santikaṃ āgamiṃsu. Atha ne kena vo kāraṇena cakkhūni vinaṭṭhānīti pucchi. Atha naṃ mātāpitaro āhaṃsu tāta mayaṃ deve vassante idha rukkhamūle vammikamatthake ṭhitā tena kāraṇena akkhīni vinaṭṭhānīti. So mātāpitūnaṃ kathaṃ sutvāva aññāsi tattha āsīvisena bhavitabbaṃ tena kuddhena nāsavāto visaṭṭho bhavissatīti. So mātāpitaro disvā rodi ceva hasi ca. Atha naṃ te pucchiṃsu kasmā tāta rodasi ceva hasi cāti. Amma tāta tumhākaṃ daharakāleyeva evaṃ cakkhūni vinaṭṭhānīti rodiṃ idāni pana tumhe paṭijaggituṃ labhissāmīti hasiṃ ammatāta tumhe mā cintayittha ahaṃ vo paṭijaggissāmīti. So mātāpitaro assāsetvā assamapadaṃ ānetvā tesaṃ rattiṭṭhāne divāṭṭhāne caṅkamaṭṭhāne paṇṇasālāyaṃ uccārapassāvaṭṭhāne cāti sabbattha ṭhānesu rajjuke bandhi. Tato paṭṭhāya te assamapade ṭhapetvā sayameva Vanamūlaphalāphalaṃ āharitvā paṇṇasālāya ṭhapetvā pātova tesaṃ vasanaṭṭhānaṃ sammajjitvā mātāpitaro vanditvā ghaṭaṃ ādāya migasammatanadiṃ gantvā pānīyaṃ āharitvā paribhojanīyaṃ upaṭṭhapetvā dantakaṭṭhamukhodakādīni datvā madhuraphalāphalaṃ deti tehi paribhuñjitvā mukhe vikkhālite sayaṃ sesaṃ paribhuñjati paribhuñjāvasāne mātāpitaro vanditvā āpucchitvā migagaṇaparivuto phalāphalatthāya araññaṃ pāvisi. Taṃ pabbatapāde kinnarā parivāretvā phalāphalaṃ gahetvā bodhisattassa adaṃsu. Sāyaṇhasamaye assamaṃ āgantvā ghaṭena udakaṃ āharitvā ghaṭaṃ ṭhapetvā udakaṃ tāpetvā uṇhodakena nesaṃ yathāruciṃ nahāpanaṃ vā pādadhovanaṃ vā katvā nahāyitvā aṅgārakapallaṃ upanetvā tesaṃ hatthapāde sedetvā tesaṃ nisinnānaṃ phalāphalaṃ datvā khādāpetvā tesaṃ paribhuñjanapariyosāne sayampi khāditvā sesakaṃ assamapade ṭhapesi. So iminā niyāmeneva mātāpitaro paṭijaggi.