Tasmiṃ samaye bārāṇasiyaṃ pilayakkho nāma rājā rajjaṃ kāresi. So migamaṃsalobhena mātaraṃ rajjaṃ paṭicchāpetvā sannaddhapañcāvudho himavantaṃ pavisitvā mige vadhitvā maṃsaṃ khādanto migasammatanadiṃ patvā anupubbena sāmassa pānīyaggahaṇatitthaṃ sampatto migapadavalañjaṃ disvā maṇivaṇṇāhi sākhāhi koṭṭhakaṃ katvā dhanuṃ āropetvā visapītaṃ saraṃ sannayhitvā tattha nisinnova acchi. Mahāsattopi sāyaṇhasamaye phalāphalaṃ āharitvā assamapade ṭhapetvā mātāpitaro Vanditvā āpucchitvā pānīyaṃ āharissāmīti cintetvā ghaṭaṃ gahetvā migagaṇaparivuto dvepi mige ekato katvāna tesaṃ piṭṭhiyaṃ pānīyaghaṭaṃ ṭhapetvā hatthena gahetvā nadītitthaṃ agamāsi. Rājāpi koṭṭhake ṭhitova taṃ tathā āgacchantaṃ disvā mayā ettakaṃ kālaṃ evaṃ himavante vicarantenāpi manusso nāma na diṭṭhapubbo devo nukho esa nāgo nukho sace panāhaṃ etaṃ upasaṅkamitvā pucchissāmi devo ce ākāsaṃ uppatissati nāgo ce bhūmiyaṃ pavisissati nakho panāhaṃ sabbakālaṃ himavanteyeva carissāmi sacāhaṃ bārāṇasiyaṃ gamissāmi tatrāpi maṃ amaccā pucchissanti api nu te mahārāja himavante vasantena kiñci acchariyaṃ diṭṭhapubbanti tatrāhaṃ evarūpo me satto diṭṭhapubboti vatvā eso ko nāmāti vutte sace na jānāmīti vakkhāmi maṃ garahissanti tasmā taṃ vijjhitvā dubbalaṃ katvā pucchissāmīti cintesi. Atha tesu migesu paṭhamameva otaritvā pānīyaṃ pivitvā uttiṇṇesu bodhisatto uggahitavatto viya mahāthero saṇikaṃ saṇikaṃ otaritvā nahātvā paṭippassaddhadaratho paccuttaritvā rattavākacīraṃ nivāsetvā ekaṃ pārupitvā ajinacammaṃ ekaṃsaṃ katvā pānīyaghaṭaṃ ukkhipitvā udakaṃ puñchitvā vāmaaṃsakūṭe ṭhapesi. Tasmiṃ pana kāle idāni vijjhituṃ samayoti rājā taṃ visapītaṃ saraṃ ukkhipitvā mahāsattassa dakkhiṇapassena vijjhi. Saro vāmapassena nikkhami. Tassa vijjhitabhāvaṃ ñatvā migagaṇā bhītabhītā palāyiṃsu. Suvaṇṇasāmapaṇḍito pana viddhopi samāno pānīyaghaṭaṃ yathā vā Tathā vā anusumbhitvā satiṃ paccupaṭṭhapetvā saṇikaṃ saṇikaṃ otāretvā vālukaṃ viyūhitvā ghaṭaṃ ṭhapetvā disaṃ vavaṭṭhapetvā mātāpitūnaṃ vasanaṭṭhānadisābhāgena sīsaṃ katvā rajatapaṭavaṇṇāya vālukāya suvaṇṇapaṭimā viya nipajjitvā satiṃ paccupaṭṭhapetvā imasmiṃ himavantappadese mama verī nāma natthi mama mātāpitūnampi verī nāma natthīti vatvā mukhena lohitaṃ chaḍḍetvā rājānaṃ adisvāva pucchanto paṭhamaṃ gāthamāha