Evantena paṭisanthāre kate rājā putto vo mayā māritoti paṭhamameva vattuṃ ayuttaṃ ajānanto viya kathaṃ samuṭṭhāpetvā kathessāmīti cintetvā āha

nālaṃ andhā vane daṭṭhuṃ ko nu vo phalamāhari

anandhassevāyaṃ sammā nivāpo mayha khāyatīti.

Tattha nālanti tumhe andhā imasmiṃ vane kiñci daṭṭhuṃ na samatthā. Ko nu vo phalamāharīti ko nu tumhākaṃ phalāphalamāhari. Nivāpoti ayaṃ sammā nayena upāyena kāraṇena kato Khāditabbayuttakānaṃ suparisuddhānaṃ phalāphalānaṃ nivāpo sanniccayo. Anandhassevāti anandhassa viya mayhaṃ khāyati upaṭṭhāti.