Iti so devarājā aparihāpetvā rañño vaṇṇaṃ kathesi.

Taṃ sutvā devagaṇā rājānaṃ daṭṭhukāmā hutvā mahārāja amhākaṃ nemirājā ācariyo tassovāde ṭhatvā taṃ nissāya amhehi ayaṃ dibbasampatti laddhā taṃ daṭṭhukāmamhā taṃ pakkosāpehi mahārājāti vadiṃsu. Sakko sādhūti sampaṭicchitvā mātaliṃ pakkosāpetvā samma mātali vejayantarathaṃ yojetvā mithilanagaraṃ gantvā nemirājānaṃ dibbayāne āropetvā idhānehīti āha. So sādhūti sampaṭicchitvā rathaṃ yojetvā pāyāsi. Sakkassa pana devehi Saddhiṃ kathentassa ca mātaliṃ pakkosāpetvā āṇāpentassa ca mātalissa rathaṃ yojentassa ca manussagaṇanāya māso atikkanto. Iti nemirañño puṇṇamāyaṃ uposathikassa pācīnasīhapañjaraṃ vivaritvā mahātale nisīditvā amaccagaṇaparivutassa sīlaṃ paccavekkhantassa pācīnalokadhātuto uggacchantena candamaṇḍalena saddhiṃyeva so ratho paññāyi. Manussā bhuttasāyamāsā attano attano gharadvāresu nisīditvā sukhakathaṃ kathentā ajja dve candā uggatāti āhaṃsu. Atha nesaṃ sallapantānaññeva so ratho pākaṭo ahosi. Mahājano nāyaṃ cando rathoti vatvā tasmiṃ khaṇe anukkamena sindhavasahassayutte mātalisaṅgāhake vejayantarethe pākaṭe jāte kassa nukho idaṃ dibbayānaṃ āgacchatīti cintetvā na kassaci aññassa amhākaṃ rājā dhammiko tasseva sakkena vejayantaratho pesito bhavissati amhākaṃyeva rañño anucchavikoti tuṭṭhahaṭṭho gāthamāha

abbhūto vata lokasmiṃ uppajji lomahaṃsano

dibbo ratho pāturahu vedehassa yasassinoti.