kuṭṭhitaṃ khārasaṃyuttaṃ tattaṃ aggisikhūpamanti.

Tattha vetaraṇinti bhikkhave mātali rañño kathaṃ sutvā nirayābhimukhaṃ rathaṃ pesetvā paṭhamaṃ kammapaccayena utunā samuṭṭhitaṃ vetaraṇiṃ nadiṃ dassesi. Tattha nirayapālā jalitāni asisattitomarabhindivālamuggarādīni āvudhāni gahetvā nerayikasatte paharanti vijjhanti pothenti. Te taṃ dukkhaṃ asahantā vetaraṇiyaṃ patanti.

Sā nadī uparijalitāhi bhindivālappamāṇāhi sakaṇṭakāhi vettalatāhi sañchannā. Te tattha bahūni vassasahassāni tiṭṭhantā pajjalitesu khuradhārātikkhiṇesu kaṇṭakesu khaṇḍākhaṇḍikā honti. Tesaṃ heṭṭhā tālappamāṇāni jalitaayasūlāni uṭṭhahanti. Nerayikasattā bahuaddhānaṃ vītināmetvā vettalatāhi galitvā sūlesu patitvā viddhasarīrā sūlesu āvuṇitamacchā viya ciraṃ pacanti. Sūlāni pajjalitāni khuradhārātikkhiṇāni ayapokkharapattāni santi. Te sūlehi galitvā ayapokkharapattesu patitvā ciraṃ dukkhavedanaṃ anubhavanti. Tato khārudake patanti udakaṃpi jalati nerayikasattāpi jalanti dhūmāpi uṭṭhahanti udakassa pana heṭṭhā nadītalaṃ khuradhārāhi sañchannaṃ. Te heṭṭhā nukho kīdisanti udake nimujjitvā khuradhārāsu khaṇḍākhaṇḍikā honti te taṃ mahādukkhaṃ adhivāsetuṃ asakkontā mahantaṃ bhayabheravaṃ ravantā vicaranti. Kadāci anusotaṃ vuyhanti kadāci Paṭisotaṃ. Atha te tīre ṭhitā nirayapālā ususattitomarabhindivālāni khipitvā te macche viya vijjhanti. Te dukkhavedanappattā mahāviravaṃ viravanti. Atha te jalitehi ayabalisehi uddharitvā ākaḍḍhitvā pajjalitaayapaṭhaviyaṃ nipajjāpetvā mukhe tattaṃ ayoguḷaṃ pakkhipanti.

Iti rājā vetaraṇiyaṃ mahādukkhapīḷite satte disvā bhītatasito hutvā kinnāma ime sattā pāpakammaṃ akaṃsūti mātaliṃ pucchi. Sopissa byākāsi.