Athekadivasaṃ eko puriso kūṭaṭṭaparājito mahāsattaṃ bhikkhāya Carantaṃ rājagehaṃ pavisantaṃ disvā vanditvā bhante tumhe rājagehe bhuñjamānā vinicchayāmacce lañcaṃ gahetvā lokaṃ vināsente kasmā ajjhupekkhatha idānimhi pañcahi amaccehi kūṭaṭṭakārakassa hatthato lañcaṃ gahetvā sāmikova samāno assāmiko katoti paridevi. So tasmiṃ kāruññavasena vinicchayaṃ gantvā dhammena vinicchinitvā sāmikaṃyeva sāmikaṃ akāsi. Mahājano ekappahāreneva mahāsaddena sādhukāraṃ adāsi. Rājā taṃ saddaṃ sutvā kiṃsaddo nāmāyanti pucchitvā tamatthaṃ sutvā katabhattakiccaṃ mahāsattaṃ upanisīditvā pucchi bhante ajja kira vo aṭṭo vinicchitoti. Āma mahārājāti. Bhante tumhesu vinicchinantesu mahājanassa vuḍḍhi bhavissati ito paṭṭhāya tumhe vinicchinathāti. Mahārāja mayaṃ pabbajitā nāma netaṃ amhākaṃ kammanti. Bhante mahājane kāruññena kātuṃ vaṭṭati tumhe sakaladivasaṃ mā vinicchinatha uyyānato pana idhāgacchantā vinicchayaṭṭhānaṃ gantvā pātova cattāro aṭṭe vinicchinatha bhutvā uyyānaṃ gacchantā cattāro evaṃ mahājanassa vuḍḍhi bhavissatīti. So tena punappunaṃ yāciyamāno sādhūti sampaṭicchi. Tato paṭṭhāya tathā akāsi. Kūṭaṭṭakārakā okāsaṃ na labhiṃsu. Tepi amaccā lañcaṃ alabhantā duggatā hutvā cintayiṃsu bodhiparibbājakassa vinicchayakālato paṭṭhāya mayaṃ kiñci na labhāma handa naṃ rājaverikoti rañño antare paribhinditvā mārāpessāmāti. Te rājānaṃ upasaṅkamitvā mahārāja bodhiparibbājako tumhākaṃ anatthakāmoti vatvā Asaddahantena raññā sīlavā eso ñāṇasampanno na evarūpaṃ karissatīti vutte mahārāja tena sakalanagaravāsino attano hatthe katā kevalaṃ amheyeva pañca jane kātuṃ na sakkoti sace amhākaṃ vacanaṃ na saddahatha tassa idhāgamanakāle parisaṃ olokeyyāthāti āhaṃsu. Rājā sādhūti sīhapañjare ṭhito taṃ āgacchantaṃ olokento parivāraṃ passitvā attano añāṇena aṭṭakārakamanusse tassa parivārāti maññamāno bhijjitvā te amacce pakkosāpetvā kinti karomāti pucchi. Gaṇhāpetha naṃ devāti. Oḷārikaṃ aparādhaṃ apassantā kathaṃ gaṇhāpessāmāti. Tenahi mahārāja pakatiparihāramassa hāpetha taṃ parihāyantaṃ disvā paṇḍito paribbājako kassaci anārocetvā sayameva palāyissatīti.