Rājā sādhūti vatvā anupubbena tassa parihāraṃ parihāpesi. Paṭhamadivasaṃ tāva naṃ tucchapallaṅkeyeva nisīdāpesuṃ. So tucchapallaṅkaṃ dasvāva rañño paribhinnabhāvaṃ ñatvā sayameva uyyānaṃ gantvā taṃ divasameva pakkamitukāmo hutvāpi ekantena ñatvā pakkamissāmīti na pakkāmi. Athassa punadivase tucchapallaṅke nisinnassa rañño pakatibhattañca aññañca gahetvā missakabhattaṃ adaṃsu. Tatiyadivase mahātalaṃ pavisituṃ adatvā sopānasīseyeva ṭhapetvā missakabhattaṃ adaṃsu. So taṃpi gahetvā uyyānaṃ gantvā bhattakiccaṃ akāsi. Catutthadivase heṭṭhā pāsādeva ṭhapetvā kāṇājakabhattaṃ adaṃsu. So taṃpi gahetvā uyyānaṃ gantvā bhattakiccaṃ akāsi. Rājā Amacce pucchi mahābodhiparibbājako sakkāre parihāpitepi na pakkamati kinti karomāti. Deva na so bhattatthāya carati chattatthāya pana carati sace bhattatthāya careyya paṭhamadivaseyeva palāyeyyāti. Idāni kiṃ karomāti. Sve ghāṭāpetha naṃ mahārājāti. So sādhūti tesaññeva hatthe khagge ṭhapetvā sve antaradvāre ṭhatvā pavisantassevassa sīsaṃ chinditvā khaṇḍākhaṇḍikaṃ katvā kiñci ajānāpetvā vaccakuṭiyaṃ pakkhipitvā nahātvā āgaccheyyāthāti āha. Te sādhūti sampaṭicchitvā sve āgantvā evaṃ karissāmāti aññamaññaṃ vicāretvā attano nivesanāni agamaṃsu. Rājāpi sāyaṃ bhuttabhojano sirisayane nipajjitvā mahāsattassa guṇe anussari. Athassa tāvadeva soko uppajji. Sarīrato sedā muñcanti sayane assādaṃ alabhanto aparāparaṃ parivatti. Athassa aggamahesī upanipajji. So tāya saddhiṃ sallāpamattaṃpi na kari. Atha naṃ sā kiṃ nukho mahārāja sallāpamattaṃpi na karotha api nukho me koci aparādho atthīti pucchi. Natthi devi api ca kho bodhiparibbājako kira amhākaṃ paccatthiko jātoti tassa sve ghāṭanatthāya pañca amacce āṇāpesiṃ te naṃ hanitvā khaṇḍākhaṇḍikaṃ katvā vaccakūpe khipissanti so pana amhākaṃ dvādasa saṃvaccharāni bahudhammaṃ desesi ekāparādhopissa mayā paccakkhato na diṭṭhapubbo parapattiyena pana hutvā tassa mayā vadho āṇatto tena kāraṇena socāmīti.