Atha naṃ sā sace deva so paccatthiko jāto taṃ ghāṭento kiṃ socasi paccatthikaṃ nāma puttaṃpi ghāṭetvā attano sotthibhāvo kātabbova mā socitthāti assāsesi. So tassā vacanena paṭiladdhassāso niddaṃ okkami. Tasmiṃ khaṇe koleyyako piṅgalasunakho taṃ kathaṃ sutvā sve mayā attano balena tassa jīvitaṃ dātuṃ vaṭṭatīti cintetvā punadivase pātova pāsādā oruyha mahādvāraṃ āgantvā ummāre sīsaṃ katvā mahāsattassa āgamanamaggaṃ olokento nipajji. Tepi kho amaccā pātova khaggahatthā āgantvā dvārantare aṭṭhaṃsu. Bodhisattopi velaṃ sallakkhetvā uyyānā nikkhamma rājadvāraṃ āgañchi. Atha naṃ sunakho disvā mukhaṃ vivaritvā catasso dāṭhā dassetvā kiṃ tvaṃ bhante jambūdīpatale aññattha bhikkhaṃ na labhasi amhākaṃ rājā taṃ māraṇatthāya pañca amacce khaggahatthe dvārantare ṭhapesi mā tvaṃ nalāṭe maccuṃ gahetvā āgamissasi sīghaṃ pakkamāti mahāsaddena viravi. So sabbarudaññutāya tamatthaṃ ñatvā tatova nivattitvā uyyānaṃ gantvā pakkamanatthāya parikkhāre ādiyi. Rājāpi sīhapañjare ṭhito taṃ āgacchantañca gacchantañca disvā sace ayaṃ mama paccatthiko bhaveyya uyyānaṃ gantvā balaṃ sannipātāpetvā kammasajjo bhavissati no ce attano parikkhāre gahetvā gamanasajjo bhavissati jānissāmi tāvassa kiriyanti uyyānaṃ gantvā mahāsattaṃ attano parikkhāre ādāya Gamissāmīti paṇṇasālato nikkhantaṃ caṅkamakoṭiyaṃ disvā vanditvā ekamantaṃ ṭhito gāthamāha

kinnu daṇḍaṃ kimājinaṃ kiṃ chattaṃ kiṃ upāhanaṃ

kiṃ aṅkusañca pattañca saṅghāṭiñcāpi brāhmaṇa

taramānarūpo gaṇhāsi kinnu patthayase disanti.