pāṭihāriyapakkhañca aṭṭhaṃgasusamāhitaṃ

uposathaṃ upavasi sadā sīlesu saṃvuto

saññamo saṃvibhāgo ca so vimānasmiṃ modatīti.

Tattha daddaḷhamānāti jajjalamānā. Ābhentīti taruṇasuriyo viya obhāsenti. Tatthāti tesu paṭipāṭiyā ṭhitesu sattasu vimānesu eko devaputto soṇadinno nāma. Mahārāja ayaṃ pubbe kassapadasabalassa kāle kāsikaraṭṭhe aññatarasmiṃ nigame soṇadinno nāma gahapati dānapati ahosi. So pabbajite uddissa sattavihārakuṭiyo kāretvā tattha vāsikepi bhikkhū catūhi paccayehi sakkaccaṃ upaṭṭhahi. So uposathañca upavasi niccaṃ sīlesu saṃvuto ahosi. So tato cavitvā idhuppanno modatīti attho. Tattha ca pāṭihāriyapakkhañcāti idaṃ pana aṭṭhamīuposathassa Paccuggamanānugamanavasena sattamīnavamiyo cātuddasīpaṇṇarasīnaṃ paccuggamanānugamanavasena terasīpāṭipade ca sandhāya vuttaṃ.