kālena yācaṃ yāceyya evaṃ mittā na jīrare.

Aticiraṃ nivāsena piyo bhavati appiyo

āmanta kho taṃ gacchāma purā te homa appiyāti.

Tattha sabbasetoti mahārāja paṭhamameva tāva tava nivesane mama odano sabbaseto ahosi yaṃ tvaṃ bhuñjasi tameva dāpesīti attho. Tatoti tato pacchā paribhedakānaṃ vacanaṃ gahetvā tava mayi virattakālepi sabalo missakodano jāto. Idānīti idāni sabbalohitako jāto. Kāloti aññāṇassa tava santikā idāni mama pakkamituṃ kālo. Abbhantaranti paṭhamaṃ mama abbhantaraṃ āsanaṃ alaṅkatamahātalamhi assitasetacchatte rājapallaṅkeyeva maṃ nisīdāpesuṃ. Majjheti sopānamatthake. Purā niddhamanā hotīti yāva gīvāyaṃ gahetvā nikkaḍḍhanā hoti. Anukhaneti sace anudakaṃ udapānaṃ patto puriso udakaṃ appassanto kalalaṃ viyūhitvā anukhaneyya tathāpi taṃ vārikaddamagandhikaṃ bhaveyya amanuññatāya na piveyya Tatheva vītasaddhaṃ payirupāsantena laddhapaccayāpi parittā ceva lūkhā ca amanuññā aparibhogārahāti attho. Pasannanti patiṭṭhitasaddhaṃ. Rahadanti gambhīraṃ mahārahadaṃ. Bhajantanti attānaṃ bhajantameva bhajeyya. Abhajantanti paccatthikaṃ. Na bhajjayeti na bhajeyya. Na bhajjatīti yo puriso attānaṃ bhajantaṃ hitacittaṃ puggalaṃ na bhajati so asappurisadhammo nāmāti. Manussapāpiṭṭhoti manussalāmako paṭikuṭṭho pacchimako. Sākhassitoti makkaṭo. Accābhikkhaṇasaṃsaggāti ativiya abhiṇhasaṃsaggena. Akāleti ayuttappattakāle parassa piyabhaṇḍaṃ yācanāya mittā jīranti nāma tvaṃpi aticiraṃ nivāsena mayi mettaṃ bhindi. Tasmāti yasmā accābhikkhaṇasaṃsaggena asamosaraṇena ca mittā jīranti tasmā. Cirāciranti cirakālaṃ vītināmetvā ciraṃ na gacche na upasaṅkame. Yācanti yācitabbaṃ bhaṇḍakaṃ yuttakāle na yāceyya. Na jīrareti evaṃ mittā na jīranti. Purā te homāti yāva tava appiyā na homa tāva āmantetvāva evaṃ gacchāmāti.