appeva nāma passema ahorattānamaccayeti.
Tattha evañce noti sace mahārāja evaṃ nānā hutvā viharantānaṃ amhākaṃ antarāyo na hessati tuyhaṃ vā mayhaṃ vā jīvitaṃ pavattissatīti dīpeti. Passemāti api nāma passeyyāma.
Evaṃ vatvā mahāsatto rañño dhammaṃ desetvā appamatto hohi mahārājāti vatvā uyyānā nikkhamitvā ekasmiṃ sabhāgaṭṭhāne bhikkhāya caritvā bārāṇasito nikkhamma anupubbena himavantokāsameva gantvā kiñci kālaṃ vasitvā puna otaritvā ekaṃ paccantagāmaṃ nissāya araññe vihāsi. Tassa pana gatakālato paṭṭhāya te amaccā puna vinicchaye nisīditvā vilopaṃ karontā cintayiṃsu sace mahābodhiparibbājako puna āgamissati jīvitaṃ no natthi kiṃ nu khvassa anāgamanakāraṇaṃ kareyyāmāti. Atha nesaṃ etadahosi ime sattā paṭibaddhaṭṭhānaṃ nāma pajahituṃ na sakkonti kiṃ nu khvassa idha paṭibaddhaṭṭhānanti. Tato rañño aggamahesīti ñatvā ṭhānaṃ kho panetaṃ vijjati yaṃ so imaṃ nissāya āgaccheyya paṭikacceva naṃ mārāpessāmāti. Te rājānaṃ etadavocuṃ ime divase ekā kathā suyyatīti. Kiṃkathā nāmāti. Mahābodhiparibbājako Ca kira devī ca aññamaññaṃ sāsanapaṭisāsanaṃ pesentīti. Kinti katvāti . tena kira deviyā pesitaṃ sakkā nu kho attano balena rājānaṃ mārāpetvā mama setacchattaṃ dātunti tāyapissa pesitaṃ rañño maraṇannāma mama bhāro mahābodhiparibbājako khippaṃ āgacchatūti. Rājā tesaṃ punappunaṃ kathentānaṃ saddahitvā idāni kiṃ kātabbanti pucchitvā deviṃ māretuṃ vaṭṭatīti vutte anupaparikkhitvāva tenahi naṃ tumheva māretvā khaṇḍākhaṇḍikaṃ chinditvā vaccakūpe khipathāti āha. Te tathā kariṃsu. Tassā māritabhāvo sakalanagare pākaṭo ahosi.
Athassā cattāro puttā iminā no niraparādhā mātā māritāti rañño paccatthikā ahesuṃ. Rājā mahābhayappatto ahosi. Mahāsatto paramparāya taṃ pavuttiṃ sutvā cintesi ṭhapetvā maṃ añño te kumāre saññāpetvā pitaraṃ khamāpetuṃ samattho nāma natthi rañño ca jīvitaṃ dassāmi kumāre pāpato mocessāmīti. So punadivase paccantagāmaṃ pavisitvā manussehi dinnaṃ makkaṭamaṃsaṃ khāditvā tassa cammaṃ yācitvā assamapade sukkhāpetvā niggandhaṃ katvā nivāsesipi pārupesipi aṃsepi ṭhapesi. Kiṃkāraṇā. Bahūpakāro meti vacanatthāya. So taṃ cammaṃ ādāya anupubbena bārāṇasiṃ gantvā kumāre upasaṅkamitvā pitughāṭakammaṃ nāma dāruṇaṃ taṃ vo na kātabbaṃ ajarāmaro satto nāma natthi ahaṃ tumhe aññamaññaṃ samagge karissāmīti āgato Tumhe mayā pahite sāsane āgaccheyyāthāti kumāre ovaditvā antonagare uyyānaṃ pavisitvā makkaṭacammaṃ attharitvā silāpaṭṭe nisīdi. Atha naṃ uyyānapālo disvā vegena gantvā rañño ārocesi. Rājā sutvāva sañjātasomanasso te amacce ādāya tattha gantvā mahāsattaṃ vanditvā nisīditvā paṭisanthāraṃ kātuṃ ārabhi. Mahāsatto tena saddhiṃ asammoditvā makkaṭacammaṃyeva parimajji. Atha naṃ evamāha bhante tumhe maṃ akathetvā makkaṭacammameva parimajjatha kiṃ vo idaṃ mayā bahūpakārataranti. Āma mahārāja bahūpakāro me esa bānaro ahamassa piṭṭhe nisīditvā vicari ayaṃ me pānīyaghaṭaṃ āhari vasanaṭṭhānaṃ sammajji abhisamācārikavattapaṭivattaṃ me akāsi ahaṃ pana attano dubbalacittatāyassa maṃsaṃ khāditvā cammaṃ sukkhāpetvā attharitvā nisīdāmi ceva nipajjāmi ca evaṃ bahūpakāro esa mayhanti. Iti so tesaṃ vāde bhindanatthāya vānaracamme ca vānare ca vānaravohāraṃ āropetvā taṃ taṃ pariyāyaṃ sandhāya imaṃ kathaṃ kathesi. So hi tassa nivatthapubbattā piṭṭhe nisīditvā vicarinti āha. Taṃ aṃse katvā pānīyaghaṭassa āhaṭattā pānīyaghaṭaṃ āharatīti āha. Tena cammena bhūmiyaṃ sammajjapubbattā vasanaṭṭhānaṃ sammajjīti āha. Nipannakāle tena cammena piṭṭhiyā akkantakāle pādānaṃ phuṭṭhapubbattā vattapaṭivattaṃ me akāsīti āha. Chātakāle pana tassa maṃsaṃ labhitvā khāditattā ahaṃ pana attano dubbalacittatāyassa maṃsaṃ khādinti āha.