taṃ cintayamāno dummanosmi
na hi devi aparādho atthi tuyhanti.
Tattha āṇatto meti bhadde cattāro paṇḍitā mahosathapaṇḍito mama paccatthikoti mayhaṃ kathayiṃsu mayā tattato avicinitvā vadhetha nanti bhūripañño vadhāya āṇatto taṃ kāraṇaṃ cintayamāno varaṃ mama maraṇaṃ na paṇḍitassāti dummanosmīti.
Tāya tassa taṃ sutvā mahāsatte sinehena pabbatamatto soko uppajji. Tato cintesi ekena upayena rājānaṃ assāsetvā rañño niddokkamanakāle mama kaniṭṭhassa sāsanaṃ pahiṇissāmīti. Atha naṃ mahārāja tayāpetaṃ kataṃ gahapatiputtaṃ mahante issariye patiṭṭhapentena tumhehi so gahapatiputto senāpataṭṭhāne ṭhapito idāni kira tumhākañceva paccatthiko jāto na kho pana paccāmitto khuddako nāma atthi māretabbova so tumhe mā cintayitthāti rājānaṃ assāsesi. So tanubhūtasoko niddaṃ okkami. Tasmiṃ khaṇe devī uṭṭhāya gabbhaṃ pavisitvā mahosatha cattāro paṇḍitā taṃ paribhindiṃsu rājā kuddho sve dvārantare sabbe tava vadhāya āṇāpesi sve rājakulaṃ mā āgaccheyyāsi sace āgacchantova nāgaraṃ hatthagataṃ katvā samattho hutvā āgaccheyyāsīti paṇṇaṃ likhitvā modakassa anto pakkhipitvā modakaṃ suttakena veṭhetvā navabhājane Pakkhipitvā chādetvā lañcetvā atthacarikāya dāsiyā adāsi imaṃ modakaṃ haritvā mama kaniṭṭhassa mahosathapaṇḍitassa dehīti. Sā tathā akāsi. Rattiṃ kathaṃ nikkhantāti na cintetabbā raññā paṭhamameva deviyā varo dinno tena taṃ na koci nivāresi. Bodhisatto paṇṇākāraṃ gahetvā taṃ uyyojesi. Sā āgantvā deviyā dinnabhāvaṃ ārocesi. Tasmiṃ khaṇe devī āgantvā raññā saddhiṃ nipajji. Mahāsattopi modakaṃ bhinditvā paṇṇaṃ vācetvā tamatthaṃ ñatvā kattabbakiccaṃ vicāretvā sayane nipajji. Itarepi cattāro janā pātova khaggaṃ gahetvā dvārantare ṭhatvā paṇḍitaṃ apassantā dummanā hutvā rañño santikaṃ gantvā kiṃ paṇḍitā hato vo gahapatiputtoti vutte na passāma devāti āhaṃsu. Mahāsattopi aruṇuggamaneyeva sugandhodakena nahātvā sabbālaṅkārapaṭimaṇḍito nānaggarasabhojanaṃ bhuñjitvā sarīrakiccaṃ sodhetvā nāgaraṃ attano hatthagataṃ katvā tattha tattha ārakkhaṃ datvā mahājanaparivuto rathavaraṃ āruyha mahantena yasena rājadvāraṃ agamāsi. Rājāpi sīhapañjaraṃ ugghāṭetvā olokento aṭṭhāsi. Atha mahāsatto rathā otaritvā rājānaṃ vanditvā aṭṭhāsi. Rājā taṃ disvā cintesi sacāyaṃ mama paccatthiko bhaveyya na maṃ vandeyyāti. Atha naṃ pakkosāpetvā rājā sayaṃ sīhāsane nisīdi. Mahāsattopi āgantvā vanditvā ekamantaṃ nisīdi. Cattāropi paṇḍitā tattheva nisīdiṃsu. Atha naṃ rājā kiñci ajānanto viya tāta tavaṃ hiyyo Paṭhamayāme gato idāni āgacchasi kiṃ maṃ evaṃ pariccajasīti vatvā imaṃ gāthamāha