Mahārāja mahanto ullolasaddo na kho pana jānāma kinnāmetaṃ vīmaṃsituṃ vaṭṭati mahārājāti āhaṃsu. Taṃ sutvā rājā brahmadatto āgato bhaveyyāti sīhapañjaraṃ vivaritvā olokento tassāgatabhāvaṃ ñatvā bhītatasito natthimhākaṃ jīvitaṃ svedāni sabbe no jīvitakkhayaṃ pāpessatīti tehi saddhiṃ sallapanto nisīdi. Mahāsatto pana tassāgatabhāvaṃ ñatvā sīho viya asambhīto sakalanagare ārakkhaṃ saṃvidahitvā rājānaṃ assāsessāmīti cintetvā rājanivesanaṃ abhiruhitvā rājānaṃ vanditvā ekamantaṃ aṭṭhāsi. Taṃ disvā paṭiladdhassāso hutvā ṭhapetvā mama puttaṃ mahosathapaṇḍitaṃ añño maṃ imamhā dukkhā mocetuṃ samattho nāma natthīti cintetvā tena saddhiṃ sallapanto imasmiṃ mahāummaṅgajātake paṭhamagāthamāha

pañcālo sabbasenāya brahmadatto samāgato

sāyaṃ pañcāliyā senā appameyyā mahosatha

viddhimatī pattimatī sabbasaṅgāmakovidā