pañcālo ca videho ca ubho ekā bhavantu teti.
Tattha santhavakāmo teti mahārāja amhākaṃ rājā tayā saddhiṃ mittasanthavaṃ kattukāmo. Ratanānīti itthīratanaṃ attano dhītaraṃ ādiṃ katvā tumhākaṃ ratanāni deti. Āgacchantūti ito paṭṭhāya kira uttarapañcālanagarato paṇṇākāraṃ gahetvā madhuravacanā piyabhāṇino dūtā idhāgacchantu ito ca tattha gacchantu. Ekā bhavantūti te gaṅgodakaṃ viya yamunodakena saddhiṃ saṃsandantaṃ ekasadisāva hontu.
Evañca pana vatvā mahārāja amhākaṃ rājā aññaṃ mahāmaccaṃ pesetukāmo hutvāpi rañño manāpaṃ katvā sāsanaṃ ārocetuṃ na sakkhissati tasmā maṃ peseti ācariya tumhe sādhukaṃ rājānaṃ bodhetvā ādāya āgacchathāti gacchatha rājaseṭṭha abhirūpañca kumārikaṃ labhissatha amhākañca raññā saddhiṃ mittasanthavo te patiṭṭhahissatīti āha. So tassa vacanaṃ sutvā tuṭṭhamānaso hutvā uttamarūpadharaṃ kira kumārikaṃ labhissāmīti savanasaṃsaggena bajjhitvā ācariya tumhākañca kira mahosathapaṇḍitassa ca dhammayuddhe vivādo ahosi gacchatha Puttaṃ me passatha ubhopi paṇḍitā aññamaññaṃ khamāpetvā mantetvā ethāti āha. Taṃ sutvā kevaṭṭo passissāmi paṇḍitanti taṃ passituṃ agamāsi. Mahāsattopi taṃ divasaṃ tassa attano santikaṃ āgatabhāvaṃ ñatvā cintesi tena me pāpadhammena saddhiṃ sallāpo mā hotūti pātova thokaṃ sappiṃ pivi. Gehaṃpissa bahalena allagomayena limpesi thambhe ca telena makkhesi. Tassa nipajjanakaṃ ekaṃ pana vatthamañcakaṃ ṭhapetvā sesāni mañcapīṭhāni nīharāpesi. So manussānaṃ saññaṃ adāsi. Tumhe brāhmaṇe kathetuṃ āraddhe evaṃ vadeyyātha brāhmaṇa mā paṇḍitena saddhiṃ katheyyāsi ajja tena sappi pītanti mayi tena saddhiṃ kathanākāraṃ karontepi deva tikhiṇasappi vo pītaṃ mā kathethāti nivāreyyāthāti evaṃ vicāretvā mahāsatto rattapaṭaṃ nivāsetvā sattame dvārakoṭṭhake purise ṭhapetvā vatthamañcake nipajji. Kevaṭṭopissa paṭhame dvārakoṭṭhake ṭhatvā kahaṃ paṇḍitoti pucchi. Atha naṃ te manussā brāhmaṇa mā saddamakari sacepi āgantukāmo tuṇhī hutvā ehi ajja paṇḍitena tikhiṇasappi pītaṃ mahāsaddaṃ kātuṃ na labhissasīti āhaṃsu. Sesadvārakoṭṭhakesupi naṃ tatheva āhaṃsu. So sattamaṃ dvārakoṭṭhakaṃ atikkamitvā paṇḍitassa santikaṃ agamāsi. Paṇḍito kathanākāraṃ dassesi. Atha naṃ manussā deva mā kathayittha tikhiṇasappi vo pītaṃ kiṃ vo iminā duṭṭhabrāhmaṇena saddhiṃ kathanenāti vatvā nivārayiṃsu. Iti so paṇḍitassa santikaṃ gantvā neva nisīdi tuṃ āsanaṃ nissāya Ṭhitaṭṭhānaṃpi na labhati allagomayaṃ akkamitvā aṭṭhāsi. Atha naṃ oloketvā eko akkhīni ummili eko bhamukaṃ ukkhipi eko kappuraṃ ākaḍḍhayi. Keci hatthapādavikārādīni dassenti. So tesaṃ kiriyaṃ oloketvā maṅkubhūto gacchāmahaṃ paṇḍitāti vatvā aparehi are duṭṭhabrāhmaṇa mā saddamākāsi sace saddameva karosi aṭṭhīni te bhindissāmāti vutte bhītatasito hutvā nivattitvā gacchanto na olokesi. Atha naṃ añño uṭṭhāya veḷupesikāya piṭṭhiyaṃ tāḷesi. Añño piṭṭhiyaṃ hatthatalena pahari. Antare añño gīvāyaṃ gahetvā khipi. So sīhamukhato muttamigo viya bhītatasito hutvā nikkhamitvā rājagehaṃ gato. Rājā cintesi ajja mama putto imaṃ pavuttiṃ sutvā tuṭṭho bhavissati dvinnaṃ paṇḍitānaṃ mahatiyā dhammasākacchāya bhavitabbaṃ ajja ubhopi aññamaññaṃ khamāpessanti lābhāvata meti. So kevaṭṭaṃ disvā paṇḍitena saddhiṃ saṃsandanākāraṃ pucchanto imaṃ gāthamāha