yasseva ghare bhuñjeyya bhogaṃ

tasseva atthaṃ puriso careyyāti

tassattho yassa rañño santikā puriso mahantaṃ issariyaṃ labhitvā bhogaṃ bhuñjeyya akkosantassāpi paribhāsantassāpi paharantassāpi gale gahetvā nikkaḍḍhantassāpi tasseva atthaṃ hitaṃ vuḍḍhiṃ paṇḍito kāyadvārādīhi tīhipi dvārehi careyya na hi mittadubbhikammaṃ nāma paṇḍitehi kātabbanti.

Iti cintetvā so nahātvā alaṅkaritvā mahantena yasena rājakulaṃ gantvā rājānaṃ vanditvā ekamantaṃ ṭhito āha kiṃ deva gamissatha uttarapañcālanagaranti. Āma tāta pañcālacandiṃ alabhantassa mama kiṃ rajjena mā maṃ pariccaja mayā saddhiṃyeva yāhi tattha no gatakāraṇā dve atthāni nipphajjissanti itthīratanañca labhāmi rañño ca mayā saddhiṃ mettī patiṭṭhahissatīti. Atha naṃ paṇḍito tena hi deva ahaṃ puretaraṃ gantvā tumhākaṃ nivesanāni māpemi tumhe mayā pahite sāsane āgaccheyyāthāti vadanto dve gāthā abhāsi