tassa taṃ vacanaṃ sutvā paṇḍitassānusārino

ummaṅgadvāraṃ vivariṃsu yantayutte ca aggaḷeti.

Tattha anusārinoti veyyāvaccakarā. Yantayutte ca aggaḷeti sūcighaṭikasampannāni ca dvārakavāṭāni.

Te ummaṅgadvāraṃ vivaritvā mahāsattassa ārocesuṃ. So rañño saññamakāsi kālo deva pāsādā otarathāti. Rājā otarati. Senako sīsato nāḷivattaṃ apanetvā sāṭakaṃ omuñcitvā kacchaṃ daḷhaṃ bandhi. Atha naṃ mahāsatto disvā senaka kiṃ karosīti pucchi. Paṇḍita ummaṅgena gacchantehi nāma veṭhanaṃ mocetvā kacchaṃ daḷhaṃ bandhitvā gantabbanti. Senaka ummaṅgaṃ pavisanto onamitvā jaṇṇukehi patiṭṭhāya pavisissāmīti mā saññamakāsi sace hatthinā gantukāmosi hatthiṃ abhirūha sace assena gantukāmosi assaṃ abhirūha ucco ummaṅgo aṭṭhārasahatthubbedho visāladvāro tvaṃ yathāruciyā alaṅkatapaṭiyatto rañño purato gacchāti āha. Bodhisatto pana senakassa gamanaṃ purato vicāretvā rājānaṃ majjhe katvā sayaṃ pacchato ahosi. Kiṃ kāraṇā. Rājā Alaṅkataummaṅgaṃ olokento mā saṇikaṃ agamāsīti. Ummaṅge mahājanassa yāgubhattakhādanīyādīni appamāṇāni ahesuṃ. Te manussā khādantā pivantā ummaṅgaṃ olokentā gacchanti. Mahāsattopi yātha yātha mahārājāti codento pacchato yāti. Rājā alaṅkatadevasabhaṃ viya ummaṅgaṃ olokento yāti.