Tamatthaṃ pakāsento satthā āha

purato senako yāti pacchato ca mahosatho

majjhe ca rājā vedeho amaccaparivāritoti.

Rañño āgatabhāvaṃ ñatvā te māṇavā rañño mātarañca deviñca puttañca dhītarañca ummaṅgā nīharitvā mahāvisālamāḷake ṭhapesuṃ. Rājāpi bodhisattena saddhiṃ ummaṅgā nikkhami. Te cattāro khattiyā rājānañca paṇḍitañca disvā nissaṃsayaṃ parahatthagatamhā mayaṃ amhe gahetvā āgatehi paṇḍitassa purisehi bhavitabbanti maraṇabhayatajjitā bhītatasitā mahāviravaṃ viraviṃsu. Cūḷanīrājā kira videharañño palāyanabhayena gantvā gaṅgātīre gāvutamatte ṭhāne aṭṭhāsi. So ca sannisinnāya rattiyā tesaṃ viravaṃ sutvā nandādeviyā saddo viyāti vattukāmo ahosi. Kuhiṃ nandādeviṃ passasīti parihāsabhayena na kiñci āha. Mahāsatto tasmiṃ ṭhāne pañcālacandiṃ kumārikaṃ ratanarāsimhi ṭhapetvā abhisiñcitvā mahārāja tvaṃ imissā kāraṇā āgatosi ayaṃ aggamahesī hotūti āha. Tīṇi nāvāsatāni upaṭṭhapesuṃ. Rājā visālamāḷakā otaritvā Alaṅkatanāvaṃ abhiruhi. Tepi cattāro khattiyā nāvaṃ abhiruhiṃsu.