duggaṇho hi tayā rājā khaluṅkeneva sindhavo

tiṇṇo hiyyo rājā gaṅgaṃ sāmacco saparijjano

haṃsarājaṃ yathā dhaṅko anujavaṃ patissatīti.

Tattha bhinnamantosīti yo tayā kevaṭṭena saddhiṃ sirisayanagabbhe manto gahito taṃ mama na jānātīti mā saññaṃ kari pageva so mayā ñātoti bhinnamantosi jātoti vadāmi. Duggaṇho hi tayāti mahārāja amhākaṃ rājā tayā assakhaluṅkena sindhavo viya duggaṇho khaluṅkaṃ āruḷhena javasampannaṃ ājānīyaṃ āruyha gacchanto viya gahetuṃ na sakkāti attho. Khaluṅko viya hi kevaṭṭo taṃ āruḷhakapuriso viya tavaṃ javasampanno sindhavo viya ahaṃ taṃ āruḷhakapuriso viya amhākaṃ rājāti dasseti. Tiṇṇo hiyyoti hiyyova uttiṇṇo so ca kho sāmacco saparijano na ekakova palāyitvā gato. Anujavanti sace pana tavaṃ taṃ anujavissasi anubandhissasi. Yathā suvaṇṇarājahaṃsaṃ anujavanto dhaṅko antarāva patissati evaṃ patissasi antarāva vināsaṃ pāpuṇissasīti vadati.