Rājā tassa taṃ acchambhītavacanaṃ sutvā cintesi ayaṃ gahapatiputto atisūro hutvā kathesi nissaṃsayaṃ vedeho palāpito bhavissatīti ativiya kujjhitvā pubbe mayaṃ gahapatiputtaṃ nissāya udarasāṭakassāpi assāmikā jātā idāni tena amhākaṃ hatthagato paccāmitto palāpito bahu vata no anatthakārako ubhinnaṃ kattabbaṃ kāraṇaṃ imasseva karissāmīti tassa kāraṇaṃ kātuṃ āṇāpento āha

imassa hatthapāde ca kaṇṇanāsañca chindatha

Yo me amittaṃ hatthagataṃ vedehaṃ parimocayi

imaṃ maṃsaṃva ātappaṃ sūle katvā pacantu naṃ