Atha naṃ rājā āha tena hi paṇḍita tava rañño divaṅgatakāle idha āgantuṃ paṭiññaṃ dehīti. So sādhu deva ahaṃ jīvanto āgamissāmīti paṭijānāti. Athassa rājā sattāhaṃ mahāsakkāraṃ katvā sattāhaccayena puna āpucchanakāle ahaṃ te paṇḍita idañcidañca dammīti vadanto gāthamāha

dammi nikkhasahassante gāmāsītiñca kāsisu

dāsīsatāni cattāri dammi bhariyāsatañca te

sabbaṃ senāṅgamādāya sotthi gaccha mahosathāti.