Tattha mithilaṃ gatanti sotthinā taṃ mithilanagaraṃ sampattaṃ passatu.

Iti so paṇḍitassa mahantaṃ sakkāraṃ katvā uyyojesi. Tepi ekasatarājāno mahāsakkāraṃ katvā bahuṃ paṇṇākāraṃ adaṃsu. Tesaṃ santike upanikkhittakapurisāpi paṇḍitameva parivārayiṃsu. So mahantena parivārena maggaṃ paṭipajjitvā antarāmaggeyeva cūḷanīraññā dinnagāmehi āyaṃ harāpetuṃ purisaṃ pesetvā vedeharaṭṭhaṃ sampāpuṇi. Senakopi kira antarāmagge purisaṃ ṭhapetvā cūḷanīrañño āgamanaṃ vā anāgamanaṃ vā jānitvā yassakassaci āgamanañca mayhaṃ ārocehīti āṇāpesi. Sopi tiyojanamatthakeyeva mahāsattaṃ disvā Āgantvā paṇḍito kira mahantena parivārena āgacchatīti senakassa ārocesi. So taṃ sutvā rājakulaṃ agamāsi. Rājāpi pāsādatale ṭhitova vātapānena bahi olokento mahatiṃ senaṃ disvā mahosathapaṇḍitassa senā mandā ayaṃ pana ativiya mahatī dissati kacci nu kho cūḷanīrājā āgato siyāti bhītatasito tamatthaṃ pucchanto āha

hatthī assā rathā pattī senā sā dissate mahā

caturaṅginī bhiṃsarūpā kinnumaññanti paṇḍitāti.