Tattha kambalassatarāti kambalassatarā nāma nāgā tassa mama mātu pakkhikā sinerupāde vasanakā nāgā te ca uṭṭhahantu aññe ca catūsu disāsu catūsu anudisāsu yattakā ca mayhaṃ vacanakarā te sabbe nāge nivedatha gantvā jānāpetha khippaṃ kira sannipātethāti āṇāpento evamāha. Tato sabbeheva sīghaṃ sannipātehi kiṃ karoma devāti vutte so sabbepi me nāgā khippaṃ bārāṇasiṃ pavajjantūti āha. Tattha gantvā kiṃ kātabbaṃ deva kiṃ nāsavātappahārena bhasmaṃ karomāti ca vutte so rājadhītari paṭibaddhacittatāya tassā vināsaṃ anicchanto mā ca kiñci viheṭhayunti āha. Tumhesu keci kiñci mā viheṭhyunti attho. Ayameva vā pāṭho.

Atha naṃ nāgā mahārāja sace koci manusso na viheṭhitabbo tattha gantvā kiṃ karissāmāti āhaṃsu. Atha ne idañcidañca karotha ahampi idaṃ nāma karissāmīti ācikkhanto gāthādvayamāha

nivesanesu sobbhesu rathiyā caccaresu ca

rukkhaggesu ca lambantu vitatā toraṇesu ca