Evamassa so tesaṃ pañcannaṃ janānaṃ kathaṃ gahetvā deviyā māritabhāvañca puttānaṃ viruddhabhāvañca sandhimukhe coraṃ cūḷāya gaṇhanto viya kathesi. Mahāsattassa hi tesaṃ amaccānaṃ niggaṇhanañca dhammadesanañca deviyā tehi māritabhāvassa āvikaraṇatthañca tattha anupubbena kathaṃ āharitvā okāsaṃ katvā etamatthaṃ kathesi. Rājā tassa vacanaṃ sutvā attano aparādhaṃ jāni. Atha naṃ mahāsatto ito paṭṭhāya mahārāja evarūpānaṃ pāpānaṃ kathaṃ gahetvā mā puna evamakāsīti vatvā ovadanto dhammañcareti ādimāha.
Tattha dhammañcareti mahārāja rājā nāma janapadaṃ adhammikena balinā apīḷento janapade dhammaṃ careyya sāmike assāmike akaronto negamesu dhammaṃ careyya aṭṭhāne akilamanto balesu dhammaṃ careyya vadhabandhaakkosaparibhāse pariharanto paccaye ca nesaṃ dento isayo na vihiṃseyya dhītaro yuttaṭṭhāne patiṭṭhapento putte sippāni sikkhāpetvā sammāpariharanto bhariyaṃ issariyavossagga- alaṅkārasammānanādīhi anuggaṇhanto puttadāre samañcareyyāti. Sa tādisoti so tādiso rājā paveṇiṃ abhinditvā dhammena rajjaṃ kārento rājāṇāya rājatejena sāmante saṃpakampeti tāpeti cāleti. Indovāti idaṃ upamatthaṃ vuttaṃ. Yathā asure jetvā abhibhavitvā ṭhitakālato paṭṭhāya asurādhipoti saṅkhaṃ gato indo vā attano sapattabhūte asure kampesi tathā kampetīti .
Evaṃ mahāsatto rañño dhammaṃ desetvā cattāropi kumāre pakkosāpetvā ovaditvā rañño katakammaṃ pakāsetvā rājānaṃ khamāpetvā mahārāja ito paṭṭhāya atuletvā paribhedakānaṃ kathaṃ gahetvā mā evarūpaṃ sāhasikakammaṃ akāsi tumhepi kumārā rañño mā dubbhitthāti sabbesaṃ ovādaṃ adāsi. Atha naṃ rājā āha ahaṃ bhante puttesu ca deviyā ca aparajjhanto ime nissāya etesaṃ kathaṃ gahetvā etaṃ pāpakammaṃ akāsiṃ ime pañcapi māremīti. Na labbhā mahārāja evaṃ kātunti. Tenahi tesaṃ hatthapāde chindāpemīti. Idaṃpi na sakkā kātunti. Rājā Sādhu bhanteti sampaṭicchitvā te sabbasaṃharaṇe katvā pañcacūḷā- karaṇagaddūlabandhanagomayasiñcanehi avamānetvā raṭṭhā pabbājesi . Bodhisattopi tattha katipāhaṃ vasitvā appamatto hohīti rājānaṃ ovaditvā himavantameva gantvā jhānābhiññā nibbattetvā yāvajīvaṃ brahmavihāre bhāvetvā brahmalokūpago ahosi.