Tattha pāpesunti yamunāto uttaritvā bārāṇasimaggaṃ pāpayiṃsu pāpayitvā ca pana tumhe gacchathāti vatvā nāgabhavanameva paccāgamiṃsu.

Brāhmaṇopi tāta somadtta imasmiṃ ṭhāne migaṃ vijjhimhā imasmiṃ sūkaranti puttassa ācikkhanto gantvā antarāmagge pokkharaṇiṃ disvā tāta somadatta nahāyāmāti vatvā sādhu tātāti vutte ubhopi dibbābharaṇāni ceva dibbavatthāni ca omuñcitvā bhaṇḍikaṃ katvā pokkharaṇītīre ṭhapetvā otaritvā nahāyiṃsu. Tasmiṃ khaṇe tāni antaradhāyitvā nāgabhavanameva agamaṃsu. Paṭhamaṃ nivatthakāsāvapilotikāva nesaṃ sarīre paṭimuñciṃsu. Dhanusarasattiyopi pākatikāva ahesuṃ. Somadattopi nāsitamhi tayā tātāti paridevi. Atha naṃ pitā mā cintayi tāta migesu santesu araññe mige vadhitvā jīvitaṃ kappessāmāti assāsesi. Somadattassa mātā tesaṃ āgamanaṃ sutvā paccuggantvā gharaṃ netvā annapānena santappesi. Brāhmaṇo bhuñjitvāva niddaṃ okkami. Itarā puttaṃ pucchi tāta somadatta ettakaṃ kālaṃ kuhiṃ gatatthāti. Amma bhūridattena nāgarājena amhe nāgabhavanaṃ nītā tato ukkaṇṭhitvā idāni āgatamhāti. Kiñci pana vo ratanaṃ ābhaṭanti. Nābhaṭaṃ ammāti. Kiṃ tumhākaṃ tena na kiñci dinnanti. Amma bhūridattena me pituno sabbakāmadado maṇi dinno ahosi iminā pana na gahitoti. Kiṃ kāraṇāti. Pabbajissati kira ammāti. Sā ettakaṃ kālaṃ dārake mama bhāre karonto nāgabhavane vasitvā idāni kira pabbajissatīti kujjhitvā vīhibhañjanadabbiyā piṭṭhiṃ pothentī hare duṭṭha brāhmaṇa pabbajissāmīti kira bhūridattena dinnaṃ maṇiratanaṃ na gaṇhasi atha kasmā apabbajitvā idhāgatosi nikkhama sīghaṃ mama gharāti santajjesi. Atha naṃ bhadde mā maṃ kujjhi araññe migesu santesu taṃ vadhitvā ahantaṃ posessāmīti vatvā tato puttena saddhiṃ araññaṃ gantvā purimaniyāmeneva jīvitaṃ kappesi.

Nesādakaṇḍaṃ niṭṭhitaṃ.

Tadā dakkhiṇamahāsamuddadisāyaṃ simbalīvāsī eko garuḷo pakkhavātehi mahāsamudde udakaṃ viyūhitvā ekaṃ nāgarājānaṃ sīse gaṇhi. Tadā hi supaṇṇā nāgaṃ gahetuṃ ajānantā eva pacchā Paṇḍarajātake jāniṃsu. So pana taṃ sīse gahetvāpi udake anottharanteyeva taṃ ukkhipitvā olambantaṃ ādāya himavantamatthakena pāyāsi. Tadā ceko kāsikaraṭṭhavāsī brāhmaṇo isipabbajjaṃ pabbajitvā himavantappadese paṇṇasālaṃ māpetvā paṭivasati. Tassa caṅkamanakoṭiyaṃ eko mahānigrodharukkho atthi. So tassa mūle divāvihāraṃ karoti. Supaṇṇo nigrodhamatthakena nāgaṃ harati. Nāgo olambanto mokkhatthāya naṅguṭṭhena nigrodhaviṭapaṃ veṭhesi. Supaṇṇo taṃ ajānantova mahabbalatāya ākāsena pakkhandiyeva. Nigrodharukkho samūlo uppāṭito. Supaṇṇo nāgaṃ simbaliṃ netvā tuṇḍena paharitvā kucchiṃ phāletvā nāgamedaṃ khāditvā sarīraṃ samuddakucchimhi chaḍḍesi. Nigrodharukkho patanto mahantaṃ saddamakāsi. Supaṇṇo kiṃ saddo esoti adho olokento nigrodharukkhaṃ disvā kuto esa mayā uppāṭitoti cintetvā tāpasassa caṅkamanakoṭiyaṃ nigrodho esoti tattato ñatvā ayaṃ tassa bahūpakāro akusalaṃ nukho me pasutaṃ udāhu noti tameva pucchitvā jānissāmīti māṇavakavesena tassa santikaṃ agamāsi. Tasmiṃ khaṇe tāpaso taṃ ṭhānaṃ samaṃ karoti. Supaṇṇarājā tāpasaṃ vanditvā ekamantaṃ nisinno ajānanto viya kissa ṭhānaṃ bhante idanti pucchi. Āvuso eko supaṇṇo gocaratthāya nāgaṃ haranto nāge mokkhatthāya nigrodhaviṭapaṃ naṅguṭṭhena veṭhetvā ṭhite so attano mahabbalatāya pakkhanditvā gatova athettha rukkho uppāṭito idaṃ tassa uppāṭitaṭṭhānanti. Kiṃ pana Bhante tassa supaṇṇassa akusalaṃ hoti udāhu noti. Sace so na jānāti acetanattā akusalaṃ na hotīti. Nāgassa pana bhanteti. So imaṃ nāsetuṃ na gaṇhi mokkhatthāya pana gaṇhi tasmā tassāpi na hotiyevāti. Supaṇṇo tāpasassa vacanaṃ sutvā tusitvā ahaṃ bhante so supaṇṇarājā tumhākaṃpi pañhābyākaraṇena tuṭṭho tumhe araññe vasatha ahañcekaṃ ālambāyanamantaṃ jānāmi anaggho manto tamahaṃ tumhākaṃ ācariyabhāgaṃ katvā dammi paṭiggaṇhatha nanti. Alaṃ mayhaṃ mantena gacchatha tumheti. So taṃ punappunaṃ yācitvā sampaṭicchāpetvā mantaṃ datvā osathāni ācikkhitvā pakkāmi.