Tasmiṃ khaṇe ālambāyano sīsanahāto suvilitto maṭṭhasāṭakaṃ nivāsetvā ratanapeḷaṃ gāhāpetvā rājadvārameva gato. Mahājano sannipatito. Rañño āsanaṃ paññattaṃ. So antonivesane Ṭhitova ahaṃ gacchāmi nāgarājānaṃ kīḷāpetūti pesesi. Ālambāyano ratanapeḷaṃ cittattharake ṭhapetvā ratanapeḷaṃ vivaritvā ehi mahānāgāti saññamadāsi. Tammiṃ samaye sudassano parisapariyante ṭhitova ahosi. Mahāsatto sīsaṃ nīharitvā sabbantaṃ parisaṃ olokesi. Nāgā dvīhi ākārehi parisaṃ olokenti supaṇṇaparipanthe vā ñātake vā dassanatthāya. Te supaṇṇaṃ disvā bhītā na naccanti ñātake disvā lajjamānā na naccanti. Mahāsatto pana olokento parisantare bhātikaṃ addasa. So akkhipūrāni assūni gahetvā peḷato nikkhamma tadabhimukho pāyāsi. Mahājano taṃ āgacchantaṃ disvā bhīto paṭikkami. Ekova sudassano aṭṭhāsi. So gantvā tassa pādapiṭṭhiyaṃ sīsaṃ ṭhapetvā parodi. Sudassanopi parodi. Mahāsatto roditvā nivattitvā peḷameva pāvisi. Ālambāyano iminā nāgena tāpaso ḍaṭṭho bhavissati assāsessāmi nanti taṃ upasaṅkamitvā āha

hatthā pamutto urago pāde te nipati bhūsaṃ

kacci nu ḍaṃsito tāta mā bhāyi sukhito bhavāti.

Tattha mā bhāyīti tāta tāpasa ahaṃ ālambāyano nāma mā bhāyi tava paṭijagganaṃ nāma mama bhāroti.