atīte bhikkhave ayaṃ bārāṇasī pupphavatī nāma ahosi. Tattha vasavattirañño putto ekarājā nāma rajjaṃ kāresi. Tassa putto candakumāro nāma uparajjaṃ kāresi. Kaṇḍahālo nāma brāhmaṇo parohito ahosi. So rañño atthañca dhammañca anusāsati. Taṃ kira rājā paṇḍitoti sutvā vinicchaye nisīdāpesi. So lañca cittako hutvā lañcaṃ gahetvā assāmikaṃ sāmikaṃ karoti sāmikaṃ assāmikaṃ karoti. Athekadivasaṃ eko aṭṭaparājito puriso vinicchayaṭṭhāne upakkosanto nikkhamitvā rājūpaṭṭhānaṃ āgacchantaṃ candakumāri disvā tassa pādesu nipatitvā parodi. So kiṃ bho purisātaṃ āha. Sāmi kaṇḍahālo vinicchaye vilopaṃ khādati ahantena lañcaṃ gahetvā parājayaṃ pāpitoti. Candakumāro mā bhāyīti vatvā taṃ assāsetvā vinicchayaṃ netvā sāmikameva sāmikaṃ akāsi assāmikameva assāmikaṃ akāsi. Mahājano mahāsaddena sādhukāramakāsi. Rājā taṃ sutvā kiṃ eso saddoti pucchi. Candakumārena kira aṭṭo suvinicchito deva tattheso sādhukārasaddoti. Rañño taṃ sutvā pīti uppajji. Candakumāro āgantvā pitaraṃ vanditvā Ekamantaṃ nisīdi. Atha naṃ rājā tāta eko kira te aṭṭo vinicchitoti pucchi. Āma devāti. Tena hi tāta ito paṭṭhāya tavameva vinicchayaṃ paṭṭhapehīti rājā vinicchayaṃ kumārassa adāsi. Kaṇḍahālassa āyo pacchijji. So tato paṭṭhāya kumāre āghātaṃ bandhitvā otārāpekkho vicari. So pana rājā mandapañño ekadivasaṃ paccūsasamaye evarūpaṃ supinaṃ addasa. Alaṅkatadvārakoṭṭhakaṃ sattaratanamayapākāraṃ saṭṭhīyojanikaṃ suvaṇṇavālukamayamahāvithiṃ yojanasahassubbedhavejayantapāsādapaṭimaṇḍitaṃ nandavanādivanarāmaṇeyyakaṃ nandapokkharādipokkharaṇīrāmaṇeyyakasamannāgataṃ ākiṇṇadevagaṇaṃ tāvatiṃsabhavanaṃ. Tattha vejayantapāsāde bahū accharā naccagītavāditā nivajjiṃsu. Rājā taṃ disvā pabujjhitvā tattha gantukāmo hutvā cintesi sve ācariyakaṇḍahālassāgatavelāya devalokagāmimaggaṃ pucchitvā tena desitamaggena devalokaṃ gamissāmīti. So pātova nahātvā vatthaṃ nivāsetvā nānaggarasabhojanaṃ paribhuñjitvā gandhaṃ vilimpitvā nisīdi. Kaṇḍahālopi pātova nahātvā vatthaṃ nivāsetvā bhojanaṃ bhuñjitvā gandhaṃ vilimpetvā rājūpaṭṭhānaṃ gantvā rājanivesanaṃ pavisitvā rañño sukhaseyyaṃ pucchi. Athassa rājā āsanaṃ dāpetvā pañhaṃ pucchi.