yathā ito vajjanti sugatiṃ narā puññāni katvānāti.

Tattha rājāsīti rājā āsi. Luddakakammoti kakkhalapharusakammo. Saggānamagganti saggānaṃ maggaṃ. Dhammavinayakusaloti sucaritadhamme ca ācāravinaye ca kusalo. Yathāti yathā pana narā puññāni katvā ito sugatiṃ gacchanti taṃ me sugatimaggaṃ ācikkhāhīti pucchi. Idampana pañhaṃ sabbaññūbuddhaṃ vā tassa sāvakaṃ vā tesaṃ alābhena bodhisattaṃ vā pucchituṃ vaṭṭati. Rājā pana yathā nāma sattāhaṃ maggamūḷho puriso aññaṃ aḍḍhamāsamattaṃ maggamūḷhaṃ purisaṃ puccheyya evaṃ kiñci ajānantaṃ andhabālaṃ kaṇḍahālaṃ pucchi. So cintesi ayaṃ me paccāmittassa piṭṭhiṃ passanakālo idāni candakumāraṃ jīvitakkhayaṃ pāpetvā mama manorathaṃ pūressāmīti. Atha so rājānaṃ āmantetvā tatiyaṃ gāthamāha

atidānaṃ deva datvāna avajjhaṃ deva ghātetvā

evaṃ vajjanti sugatiṃ narā puññāni katvānāti.