usabhehi ājānīyehi catūhi

sabbacatukkehi deva yaññaṃ yajitabbanti.

Sopissa byākarontova tena devalokamaggaṃ puṭṭho nirayamaggaṃ byākāsi.

Tattha puttehīti attano jātehi piyaputtehi ceva piyadhītāhi ca. Mahesīhīti piyabhariyāhi. Negamehīti seṭṭhīhi. Usabhehīti sabbasetehi usabharājūhi. Ājānīyehīti maṅgalaassehi. Catūhīti etehi sabbeheva aññehi ca hatthīādīhi catūhīti evaṃ sabbacatukkehi deva yaññaṃ yajitabbaṃ. Etesañca rājaputtādīnaṃ khaggena sīsaṃ chinditvā suvaṇṇapātiyā galalohitaṃ gahetvā āvāṭe pakkhipitvā yaññassa yajanakā rājāno sarīreneva saha devalokaṃ gacchanti mahārāja samaṇabrāhmaṇakapaṇaddhikavanibbakayācakānaṃ ghāsacchādanādidānaṃ sampadānaṃ atidānameva na hoti ime pana puttadhītādayo māretvā tesaṃ galalohitena yaññassa yajanaṃ atidānaṃ nāmāti rājānaṃ saññāpesi. Iti so cintesi sace candakumāraṃ ekaññeva gaṇhissāmi vericittena kāraṇaṃ maññissantīti tasmā taṃ mahājanassa antare pakkhipi. Imampana tesaṃ kathentānaṃ kathaṃ sutvā antepurajanā bhītatasitā hutvā ekappahāreneva mahāviravaṃ viraviṃsu.