Brāhmaṇopi rājānaṃ kiṃ mahārāja yaññaṃ yajituṃ sakkosi na sakkosīti pucchi. Kiṃ kathesi ācariya yaññaṃ yajitvā devalokaṃ gamissāmīti. Mahārāja bhīrukajātikā dubbalajjhāsayā purisā yaññaṃ yajituṃ samatthā nāma na honti tumhe idha sabbe pāṇe sannipātetha ahaṃ yaññāvāṭe kammaṃ karissāmīti attano pahonakaṃ balaṃ gahetvā nagarā nikkhamma yaññāvāṭaṃ samatalaṃ kāretvā vatiyā parikkhipi. Kiṃ kāraṇā. Dhammiko hi samaṇo vā brāhmaṇo vā āgantvā taṃ vāreyyāti tasmā yaññāvāṭaṃ vatiyā parikkhepanaṃ cāritanti katvā porāṇabrāhmaṇehi ṭhapitaṃ. Rājāpi purise pakkosāpetvā tātā ahaṃ attano puttadhītaro ca bhariyāyo ca māretvā yaññaṃ yajitvā devalokaṃ gamissāmi gacchatha nesaṃ ācikkhitvā sabbe idha ānethāti puttānaṃ tāva ānayanatthāya āha

gacchatha vadetha kumāre candañca suriyañca bhaddasenañca

sūrañca rāmagottañca pasu kira hotha yaññatthāyāti.

Tattha candañca suriyañcāti candakumāro ca suriyakumāro ca Dve gotamideviyā aggamahesiyā puttā. Bhaddaseno ca pana sūro ca rāmagotto ca tesaṃ vemātikabhātaro. Pasu kira hothāti ekasmiṃ ṭhāne rāsi hothāti mā pakiretthāti attho.