Te paṭhamaṃ candakumārassa santikaṃ gantvā āhaṃsu tāta kumāra tumhākaṃ kira pitā tumhe māretvā devalokaṃ gantukāmo tumhākaṃ gahaṇatthāya amhe pesesīti. So kassa vacanena maṃ gaṇhāpetīti. Kaṇḍahālassa vacanenāti. Kiṃ so maññevekaṃ gaṇhāpeti udāhu aññepi gaṇhāpetīti. Aññepi gaṇhāpesi sabbacatukkaṃ kira yaññaṃ yajāpetukāmoti. So cintesi tassa aññehi saddhiṃ veraṃ natthi vinicchaye vilopaṃ kātuṃ alabhanto atha ca pana mayi ekasmiṃ vericittena bahū jane mārāpeti hotu pitaraṃ daṭṭhuṃ labhantassa sabbesaṃ mocanaṃ nāma mama bhāroti. Atha ne rājapurise āha tena hi me pitu vacanaṃ karothāti. Te taṃ ānetvā rājaṅgaṇe ekamante ṭhapetvā itarepi tayo ānetvā tasseva santike ṭhapetvā rañño ārocayiṃsu ānītā te deva puttāti. So tesaṃ vacanaṃ sutvā tātā idāni me dhītaro ānetvā tesaññeva bhātikānaṃ santike karothāti catasso dhītaro āharāpetuṃ itaraṃ gāthamāha

kumāriyopi vadetha upasenañca kokilañca

muditañca nandañcāpi kumārikaṃ

pasu kira hotha yaññatthāyāti.